Railways Child Ticket Rules: పిల్లలతో రైలు ప్రయాణమా.? వారికి టికెట్ తీసుకోవాలా లేదా.? రైల్వే రూల్స్ ఏమి చెబుతున్నాయంటే..

Railways Child Ticket Rules: రైలు ప్రయాణంలో టికెట్ విషయంలో ప్రయాణికులు, రైల్వే సిబ్బంది మధ్య వాగ్వాదాలకు సంబంధించిన వీడియోలు తరచూ సోషల్ మీడియాలో వైరల్ అవుతుంటాయి. తాజాగా ఓ ప్రయాణికుడు తన చిన్నారి టికెట్ విషయంలో టికెట్ తనిఖీ చేసే సిబ్బందితో వాగ్వాదానికి దిగిన వీడియో చర్చనీయాంశంగా మారింది. పిల్లల వయసు, టికెట్ అవసరం వంటి అంశాలపై ఇద్దరి మధ్య మాటామాటా పెరిగినట్లు వీడియోలో కనిపిస్తోంది. అయితే రైలులో ప్రయాణించే సమయంలో పిల్లలకు టికెట్ తీసుకోవాలా లేదా..? అసలు రైల్వే రూల్స్ ఏంటో చూసేద్దామా..

5 ఏళ్లలోపు పిల్లలకు టికెట్?

రైల్వే నిబంధనల ప్రకారం.. 5 సంవత్సరాల లోపు పిల్లలకు ప్రత్యేక సీటు లేదా బెర్త్ తీసుకోకుండా తల్లిదండ్రులతో కలిసి ప్రయాణిస్తే ప్రత్యేక టికెట్ అవసరం ఉండదు. అలాంటి పిల్లలు తల్లిదండ్రులు లేదా వారితో ప్రయాణిస్తున్న వ్యక్తితోనే కూర్చోవాలి లేదా పడుకోవాలి. అయితే చిన్నారికి ప్రత్యేకంగా సీటు లేదా బెర్త్ కావాలంటే టికెట్ తీసుకోవాల్సి ఉంటుంది. అందువల్ల టికెట్ బుక్ చేసే సమయంలో పిల్లల వయసుతో పాటు ప్రత్యేక బెర్త్ అవసరమా లేదా అనే విషయాన్ని కూడా సరిగ్గా నమోదు చేయడం ముఖ్యం.

5 నుంచి 12 ఏళ్లలోపు పిల్లలకు?

5 సంవత్సరాల నుంచి 12 సంవత్సరాల లోపు పిల్లలకు టికెట్ అవసరం ఉంటుంది. ప్రత్యేక సీటు లేదా బెర్త్ తీసుకోకుండా రాయితీ చార్జీతో టికెట్ బుక్ చేసుకునే అవకాశం ఉంటుంది. దీనినే సాధారణంగా ‘హాఫ్ టికెట్’ అని పిలుస్తుంటారు. అయితే తక్కువ చార్జీతో టికెట్ తీసుకున్నంత మాత్రాన పిల్లలకు ప్రత్యేక సీటు లేదా బెర్త్ కేటాయించబడదు. వారు తల్లిదండ్రులు లేదా తమతో ప్రయాణిస్తున్న వ్యక్తి సీటులోనే కూర్చోవాలి లేదా పడుకోవాలి.

ప్రత్యేక బెర్త్ కావాలంటే..

5 నుంచి 12 సంవత్సరాల లోపు పిల్లలకు ప్రత్యేక సీటు లేదా బెర్త్ కావాలంటే సాధారణంగా పూర్తి ఛార్జీతో టికెట్ బుక్ చేయాల్సి ఉంటుంది. కాబట్టి టికెట్ బుక్ చేసే సమయంలో పిల్లవాడికి ప్రత్యేక బెర్త్ అవసరమా లేదా అనే విషయాన్ని ముందుగానే నిర్ణయించుకోవాలి. ఇక 12 సంవత్సరాలు లేదా అంతకంటే ఎక్కువ వయసున్న పిల్లలకు సాధారణంగా పెద్ద ప్రయాణికుల తరహాలో టికెట్ బుక్ చేయాలి. అందుకే రైల్వే టికెట్ రిజర్వేషన్ సమయంలో పిల్లల వయసును కచ్చితంగా నమోదు చేయడం చాలా ముఖ్యం.

పిల్లవాడు పాఠశాలలో ఏ తరగతిలో చదువుతున్నాడన్నది కాకుండా.. టికెట్ నిబంధనలకు అతని వయసే ప్రధాన ఆధారం. కాబట్టి కేవలం చిన్నగా కనిపిస్తున్నాడనే కారణంతో టికెట్ నిబంధనల్లో మినహాయింపు లభించదు. రైలులో పిల్లలతో ప్రయాణించే సమయంలో వారి వయసు, ప్రత్యేక సీటు లేదా బెర్త్ అవసరం వంటి వివరాలను ముందుగానే పరిశీలించి టికెట్ బుక్ చేసుకోవాలి. ఇలా చేయడం వల్ల ప్రయాణ సమయంలో టికెట్ తనిఖీల సందర్భంగా అనవసరమైన ఇబ్బందులు, వాగ్వాదాలను నివారించవచ్చు.