US Midterm Elections: అమెరికా మధ్యంతర ఎన్నికల (Midterm Elections) ఫలితాలు ప్రస్తుతం రాజకీయ వర్గాల్లో తీవ్ర ఆసక్తిని రేకెత్తిస్తున్నాయి. ఈ ఎన్నికల్లో భారతీయ సంతస్తికి చెందిన పలువురు అభ్యర్థులు బరిలో నిలవగా, వారి రాజకీయ భవితవ్యంపై ఉత్కంఠ నెలకొంది. ఫ్లోరిడా నుంచి డెమోక్రటిక్ పార్టీ తరఫున పోటీ చేసిన పియా దండియా ఘన విజయం సాధించి సంచలనం సృష్టించగా, ఓహియో గవర్నర్ బరిలో నిలిచిన వివేక్ రామస్వామికి మాత్రం నిరాశ ఎదురైంది.
అమెరికాలో అధ్యక్షుడి పదవీకాలం నాలుగేళ్లు ఉంటుంది. సరిగ్గా రెండేళ్ల తర్వాత మధ్యంతర ఎన్నికలు జరగడం అక్కడి రాజకీయ ఆనవాయితీ. ఈ ఎన్నికల్లో ప్రతినిధుల సభ (House of Representatives) లోని మొత్తం 435 స్థానాలతో పాటు, సెనేట్‌లోని మూడో వంతు సీట్లు, పలు రాష్ట్రాల గవర్నర్ పదవులకు పోలింగ్ జరుగుతుంది. ఈ ఎన్నికల్లో ఫ్లోరిడాలోని 22వ కాంగ్రెషనల్ డిస్ట్రిక్ట్ నుంచి పోటీ చేసిన భారతీయ మూలాలున్న పియా దండియా అద్భుత విజయాన్ని అందుకున్నారు. మాజీ స్కూల్ ప్రిన్సిపాల్ అయిన ఆమె, సుమారు 52.2 శాతం ఓట్లు సాధించి తన సమీప ప్రత్యర్థి రిపబ్లికన్ అభ్యర్థి కేశి అస్కర్‌ను ఓడించారు.
మరోవైపు, ఓహియో గవర్నర్ ఎన్నికల్లో ట్రంప్ మద్దతుతో బరిలో దిగిన రిపబ్లికన్ అభ్యర్థి వివేక్ రామస్వామి ఓటమి చవిచూడాల్సి వచ్చింది. ఆయనపై డెమోక్రటిక్ అభ్యర్థి ఆమీ ఆక్టన్ విజయం సాధించారు. ఇక ఇతర భారతీయ సంతతి అభ్యర్థుల విషయానికి వస్తే.. అరిజోనా తొలి కాంగ్రెషనల్ డిస్ట్రిక్ట్ నుంచి పోటీ చేస్తున్న అమిశ్ షా ఫలితం ఇంకా వెలువడాల్సి ఉంది. లాస్ ఏంజిల్స్ మేయర్ పదవికి నైత్యా రామన్, అలాగే న్యూయార్క్ అటార్నీ జనరల్ పదవికి సరిత కొమారెడ్డి పోటీపడుతున్నారు. వీరిద్దరి ఎన్నికల ఫలితాలపై కూడా సర్వత్రా ఉత్కంఠ కొనసాగుతోంది.
ఇక, అమెరికా మధ్యంతర ఎన్నికల ఫలితాల్లో డొనాల్డ్ ట్రంప్‌కు భారీ షాక్ తగిలింది. ఊహించని పరిణామాల మధ్య యూఎస్ సెనేట్‌ను డెమోక్రాట్లు దక్కించుకుని తమ ఆధిక్యాన్ని చాటుకున్నారు. దశాబ్దాలుగా రిపబ్లికన్ల కంచుకోటలుగా ఉన్న రాష్ట్రాల్లో డెమోక్రాట్లు ఘన విజయం సాధించి వర్జీనియా నుంచి టెక్సాస్ వరకు వీచిన “బ్లూ వేవ్”తో తమ పాగా వేశారు. ముఖ్యంగా టెక్సాస్, కాన్సాస్, ఓహియో వంటి కీలక రాష్ట్రాల్లో డెమోక్రాట్లు తమ హవా చాటారు. టెక్సాస్ సెనేట్ స్థానంలో దశాబ్దాల తర్వాత డెమోక్రాటిక్ అభ్యర్థి ఘన విజయం సాధించగా, కాన్సాస్‌లో ఏకంగా దాదాపు 94 ఏళ్ల సుదీర్ఘ విరామం తర్వాత సెనేట్ సీటును డెమోక్రాట్లు కైవసం చేసుకుని సరికొత్త చరిత్ర సృష్టించారు.