Ind Vs NZ: న్యూజిలాండ్ అద్భుత ప్లాన్.. డీకోడ్ చేయలేకపోయిన టీమిండియా.. ఘోర పరాజయం..

న్యూజిలాండ్ పర్యటనలో ఉన్న టీమిండియా నాలుగో టీ20 మ్యాచ్‌లో ఘోర పరాజయాన్ని మూటకట్టుకుంది. ఆక్లాండ్‌లోని ఈడెన్ పార్క్ వేదికగా జరిగిన ఈ మ్యాచ్‌లో ఆల్‌రౌండ్ ప్రదర్శనతో అదరగొట్టిన కివీస్ జట్టు 87 పరుగుల భారీ తేడాతో భారత్‌ను ఓడించింది. వరుస ఓటముల తర్వాత ఎట్టకేలకు పుంజుకున్న న్యూజిలాండ్ జట్టు తన అసలు సిసలైన బలాన్ని నిరూపించుకోగా, ఈ గెలుపుతో ఐదు మ్యాచ్‌ల టీ20 సిరీస్‌ను 3-1 తో  ముందుకు సాగుతోంది. 

న్యూజిలాండ్ మాస్టర్ ప్లాన్.. బౌన్స్ అస్త్రంతో దెబ్బ: ముఖ్యంగా టీమిండియా ఓపెనింగ్ భాగస్వామ్యం ప్రతి మ్యాచ్‌లోనూ విధ్వంసం సృష్టిస్తుండటంతో, వారిని ఎంత త్వరగా పెవిలియన్‌కు పంపితే విజయం తమ చేతిలోకి వస్తుందని న్యూజిలాండ్ మేనేజ్‌మెంట్ వ్యూహం రచించింది. భారత బ్యాటర్లు బౌన్స్ అయ్యే బంతులను ఆడటంలో కాస్త ఇబ్బంది పడుతున్నారని గమనించిన కివీస్ బౌలర్లు, దాన్నే ప్రధాన అస్త్రంగా మార్చుకున్నారు. టాస్ గెలిచి ముందుగా బ్యాటింగ్ చేసి భారీ స్కోరు సాధిస్తే, ఆ చేజింగ్ ఒత్తిడిలో భారత్ మొదటి బంతి నుంచే భారీ షాట్లకు ప్రయత్నిస్తుందని ముందే ప్లాన్ చేశారు. వారు అనుకున్నట్లే భారత ఓపెనర్లు తీవ్ర ఒత్తిడితో భారీ షాట్లకు యత్నించి, బౌన్స్ బంతులకు ఫీల్డర్లకు చిక్కి వరుసగా వికెట్లు పారేసుకున్నారు.

బౌలింగ్‌లో విఫలం.. కొండంత లక్ష్యం: ముందుగా బ్యాటింగ్ చేసిన న్యూజిలాండ్ నిర్ణీత 20 ఓవర్లలో 7 వికెట్ల నష్టానికి 259 పరుగుల భారీ స్కోరు సాధించింది. గ్లెన్ ఫిలిప్స్ సెంచరీ (49 బంతుల్లో 107; 6 ఫోర్లు, 10 సిక్సర్లు)తో విరుచుకుపడగా, మైఖేల్ బ్రేస్‌వెల్ (25 బంతుల్లో 65) విధ్వంసం సృష్టించాడు. భారత బౌలర్లు దారుణంగా విఫలమై ధారాళంగా పరుగులు సమర్పించుకున్నారు.

విఫలమైన టీమిండియా బ్యాటింగ్: 260 పరుగుల కొండంత లక్ష్యంతో బరిలోకి దిగిన టీమిండియా 20 ఓవర్లలో 9 వికెట్లకు 172 పరుగులకే పరిమితమైంది. కివీస్ విసిరిన షార్ట్ పిచ్, బౌన్స్ వ్యూహాలను డీకోడ్ చేయలేక భారత బ్యాటర్లు ఒకరివెనుక ఒకరు పెవిలియన్‌కు చేరారు. సంజూ శాంసన్ (4), ఇషాన్ కిషన్ (0) నిరాశపరచగా, అభిషేక్ శర్మ (27), శ్రేయస్ అయ్యర్ (22), నితీష్ కుమార్ రెడ్డి (21), నమన్ ధీర్ (28) కొద్దిసేపు పోరాడినా పెవిలియన్ బాట పట్టారు. తిలక్ వర్మ ఒక్కడే టాప్ స్కోరర్‌గా నిలిచి 35 పరుగులు చేసినా నెమ్మదిగా ఆడటంతో ఆశించిన ఫలితం దక్కలేదు. కివీస్ బౌలర్లలో జాకబ్ డఫీ 4 వికెట్లతో భారత్‌ను తీవ్రంగా దెబ్బతీశాడు. అన్ని రంగాల్లోనూ విఫలమైన ఇండియా ఈ మ్యాచ్‌లో ఘోర పరాజయాన్ని మూటకట్టుకుంది. ఇరు జట్ల మధ్య చివరిదైన ఐదో టీ20 మ్యాచ్ నవంబర్ 1వ తేదీన జరగనుంది.