IND vs NZ: రెండో వన్డే మ్యాచ్ రద్దు కానుందా..?

IND vs NZ: భారత్, న్యూజిలాండ్ మధ్య 5 మ్యాచ్‌ల వన్డే సిరీస్‌లో రెండో పోరు వర్షం కారణంగా రద్దయ్యే ప్రమాదం పొంచి ఉంది. శనివారం (నవంబర్ 7) వెల్లింగ్టన్‌లోని హెన్రీ స్టేడియంలో ఈ మ్యాచ్ జరగనుంది. అయితే అక్కడి వాతావరణం అభిమానులను నిరాశపరిచేలా ఉంది. మ్యాచ్ ప్రారంభం నుంచి రాత్రి వరకు వర్షం కురిసే అవకాశం ఉందని వాతావరణ అంచనాలు సూచిస్తున్నాయి.

నవంబర్ 7న వెల్లింగ్టన్‌లో రోజంతా వర్షం పడే అవకాశాలు 60%గా ఉన్నాయి. స్థానిక కాలమానం ప్రకారం మధ్యాహ్నం 3 గంటలకు మ్యాచ్ ప్రారంభం కావాల్సి ఉండగా.. అదే సమయం నుంచి వర్షం కురిసే అవకాశం ఉంది. సాయంత్రం 5 నుంచి 7 గంటల మధ్య వర్షం కొంత తగ్గే సూచనలు ఉన్నప్పటికీ.. ఆ సమయంలో కొన్ని ఓవర్ల ఆట మాత్రమే సాధ్యమవ్వొచ్చు. రాత్రి 8 గంటల నుంచి మళ్లీ వర్షం పెరిగే అవకాశం ఉంది. ఈ అంచనాల ప్రకారం పూర్తి స్థాయి మ్యాచ్ జరగడం కష్టమే. వర్షం కారణంగా ఆటకు పదేపదే అంతరాయం కలగవచ్చు. పరిస్థితులు అనుకూలించకపోతే మ్యాచ్ రద్దయ్యే అవకాశాలు కూడా ఉన్నాయి.

ఆక్లాండ్ వేదికగా జరిగిన తొలి వన్డేలో భారత్ 5 వికెట్ల తేడాతో (DLS పద్ధతిలో) విజయం సాధించింది. తొలుత బ్యాటింగ్ చేసిన న్యూజిలాండ్ 185 పరుగులకే ఆలౌట్ అయింది. లక్ష్య ఛేదనలో భారత్‌కు తొలి ఓవర్‌లోనే రోహిత్ శర్మ రూపంలో ఎదురుదెబ్బ తగిలింది. అయితే కెప్టెన్ శుభ్‌మన్ గిల్, విరాట్ కోహ్లీ ఇన్నింగ్స్‌ను చక్కదిద్దారు. వర్షం కారణంగా మ్యాచ్‌కు పలుమార్లు అంతరాయం కలిగింది. చివరకు భారత్ లక్ష్యాన్ని 143 పరుగులకు కుదించారు. విరాట్ కోహ్లీ 74 పరుగులతో రాణించడంతో టీమిండియా సులభంగా లక్ష్యాన్ని అందుకుంది. దీంతో ఐదు మ్యాచ్‌ల సిరీస్‌లో భారత్ 1-0తో ఆధిక్యంలో నిలిచింది.