Imran Tahir: “ఏజ్ ఈజ్ జస్ట్ నెంబర్..” 47 ఏళ్ల వయసులోనూ తగ్గేదేలే.. ఇమ్రాన్ తాహిర్ రికార్డు.!

Imran Tahir: ‘వయసు అనేది కేవలం ఒక సంఖ్య మాత్రమే’ అనే మాటను దక్షిణాఫ్రికా మాజీ స్పిన్నర్ ఇమ్రాన్ తాహిర్ (Imran Tahir) మరోసారి నిజం చేశారు. 47 ఏళ్ల వయసులోనూ టీ20 క్రికెట్‌లో తన సత్తా చాటుతూ అదరగొడుతున్నాడు. యువ ఆటగాళ్లతో పోటీ పడుతూ కరీబియన్ ప్రీమియర్ లీగ్‌ (CPL) 2026లో తన టీ20 కెరీర్‌లోనే అత్యుత్తమ బౌలింగ్ ప్రదర్శనను నమోదు చేశారు.

CPL 2026లో భాగంగా జరిగిన 31వ మ్యాచ్‌లో సెయింట్ లూసియా కింగ్స్‌తో తలపడిన గయానా అమెజాన్ వారియర్స్‌కు ఇమ్రాన్ తాహిర్ కెప్టెన్‌గా వ్యవహరిస్తున్నాడు. ఈ మ్యాచ్‌లో కెప్టెన్‌గా ముందుండి జట్టును నడిపించడమే కాకుండా, బంతితోనూ ప్రత్యర్థి బ్యాటర్లను వణికించాడు. సెయింట్ లూసియా కింగ్స్‌పై ఇమ్రాన్ తాహిర్ కేవలం 4 ఓవర్లలో 17 పరుగులు మాత్రమే ఇచ్చి 5 వికెట్లు పడగొట్టారు. ఇది టీ20ల్లో ఆయనకు అత్యుత్తమ బౌలింగ్ ప్రదర్శన. ఇంతకుముందు టీ20ల్లో తాహిర్ అత్యుత్తమ ప్రదర్శన 21 పరుగులు ఇచ్చి 5 వికెట్లు తీయడం. తాజాగా ఆ రికార్డును అధిగమించారు.

ఇమ్రాన్ తాహిర్ తన CPL కెరీర్‌లో రెండోసారి ఐదు వికెట్ల ఘనత సాధించగా.. మొత్తం టీ20 కెరీర్‌లో ఇది ఆరోసారి. అంతేకాకుండా CPLలో కెప్టెన్‌గా ఐదు వికెట్లు తీసిన తొలి ఆటగాడిగా కూడా రికార్డు సృష్టించారు. అంతేకాదు, 47 ఏళ్ల వయసులో ఐదు వికెట్లు తీసిన ఇమ్రాన్ తాహిర్ ఫ్రాంచైజీ క్రికెట్‌లో ఈ ఘనత సాధించిన అత్యంత పెద్ద వయసున్న ఆటగాడిగా ప్రపంచ రికార్డు నెలకొల్పారు. వయసు పెరుగుతున్న కొద్దీ ఆటకు దూరం కావాల్సిన సమయంలోనూ తాహిర్ తన స్పిన్‌తో యువ ఆటగాళ్లకు గట్టి పోటీ ఇస్తున్నారు.

తాహిర్ అద్భుత బౌలింగ్‌కు సెయింట్ లూసియా కింగ్స్ బ్యాటింగ్ పూర్తిగా కుప్పకూలింది. గయానా బౌలర్ల ధాటికి ఆ జట్టు 20 ఓవర్లు కూడా పూర్తి చేయలేకపోయింది. 18.5 ఓవర్లలోనే 119 పరుగులకు ఆలౌట్ అయింది. ఆ తర్వాత గయానా అమెజాన్ వారియర్స్‌ 18.3 ఓవర్లలో 122/6 పరుగులు చేసి విజయం సాధించింది. 5 వికెట్ల ప్రదర్శనతో ఇమ్రాన్ తాహిర్ కు మ్యాన్ అఫ్ ది మ్యాచ్ అవార్డు దక్కింది. ++

Imran Tahir picked 5/17 in the CPL at the age of 47. 🤯 pic.twitter.com/yIG2qsZXcG

— Mufaddal Vohra (@mufaddal_vohra) September 10, 2026