Ganesh Immersion: హైదరాబాద్‌లో కొనసాగుతున్న గణేష్ నిమజ్జన శోభాయాత్ర.. ట్యాంక్‌బండ్ వైపు పోటెత్తిన గణనాథులు

Ganesh Immersion: హైదరాబాద్‌లో గణేష్ నిమజ్జన శోభాయాత్రలు కోలాహలంగా కొనసాగుతున్నాయి. సచివాలయం రోడ్‌ నుంచి ఎన్టీఆర్ మార్గ్‌ వరకు దారిపొడవునా వినాయక విగ్రహాలు దర్శనమిస్తున్నాయి. తెలంగాణ తల్లి ఫ్లైఓవర్‌ కింద నుంచి ట్యాంక్‌బండ్‌ వైపు వెళ్లే మార్గం గణేష్ విగ్రహాల వాహనాలతో కిక్కిరిసిపోయింది. నగరంలోని ప్రధాన రహదారులన్నీ ట్యాంక్ బండ్ వైపే సాగుతుండటంతో ట్రాఫిక్‌ రద్దీ నెలకొంది.

అయినా జోష్ ఏమాత్రం తగ్గకుండా గణేష్ నిమజ్జన శోభాయాత్ర కొనసాగుతోంది. వేలాది గణనాథుల విగ్రహాలు నిమజ్జనం కోసం తరలివస్తుండగా.. యువత ఆటపాటలతో, నృత్యాలతో గణపయ్యలకు ఘనంగా వీడ్కోలు పలుకుతున్నారు. రాత్రంతా ప్రశాంతంగా సాగిన నిమజ్జన కార్యక్రమాలు తెల్లవారుజామున కూడా కొనసాగాయి. ప్రస్తుతం కూడా ఇంకా వందలాది విగ్రహాలు నిమర్జనానికి సిద్ధంగా ఉన్నాయి.

మరోవైపు పాతబస్తీలోని చార్మినార్‌ వద్ద గణేష్ నిమజ్జన శోభాయాత్ర ప్రశాంతంగా ముగిసింది. ఎలాంటి అవాంఛనీయ ఘటనలు చోటుచేసుకోకపోవడంతో పోలీసులు ఊపిరి పీల్చుకున్నారు. చార్మినార్‌ మీదుగా 1,500కు పైగా గణేష్ విగ్రహాలను ట్యాంక్‌బండ్‌, వినాయక సాగర్‌ వైపు తరలించారు. భారీ పోలీస్‌ బందోబస్తు మధ్య శోభాయాత్ర సాగింది. భద్రతా ఏర్పాట్లలో సుమారు 5 వేల మంది పోలీసు సిబ్బంది విధులు నిర్వహించారు. ఎలాంటి అవాంఛనీయ ఘటనలు చోటుచేసుకోకుండా పటిష్టమైన భద్రతా చర్యలు చేపట్టి.. శోభాయాత్రను ప్రశాంత వాతావరణంలో ట్యాంక్‌బండ్‌ వైపు సాగనంపారు.

చార్మినార్‌ నుంచి వినాయక సాగర్‌ వైపు చివరి గణనాథుడు ఉదయం 2:30 గంటల సమయంలో తరలివెళ్లాడు. దీంతో చార్మినార్‌ నుంచి సాగిన గణేష్ నిమజ్జన శోభాయాత్ర ప్రశాంతంగా ముగిసింది. విధి నిర్వహణలో రాత్రంతా బందోబస్తులో ఉన్న పోలీసులు.. కార్యక్రమం ప్రశాంతంగా ముగియడంతో డ్యాన్సులు చేస్తూ తమ ఆనందాన్ని వ్యక్తం చేశారు. విధి నిర్వహణలోని ఒత్తిడిని స్టెప్పులతో తగ్గించుకున్నారు.