Attack On Ship: ఉక్రెయిన్ ఒడెసా పోర్టులో కార్గో నౌకపై దాడి.. నలుగురు భారతీయులు మృతి..

ఉక్రెయిన్‌లోని ఒడెసా రేవు నుంచి జూలై 19 సాయంత్రం బయలుదేరిన ‘ఎమ్‌వీ గోల్డెన్ లియో’ (MV Golden Leo) అనే వాణిజ్య కార్గో నౌకపై జరిగిన భీకర దాడిలో నలుగురు భారతీయ పౌరులు ప్రాణాలు కోల్పోయారు. ఈ ప్రమాదంలో తీవ్రంగా గాయపడిన మరొక భారతీయుడి పరిస్థితి ప్రస్తుతం అత్యంత విషమంగా ఉంది. దాడి జరిగిన సమయంలో ఈ నౌకలో మొత్తం 17 మంది సిబ్బంది ఉండగా, అందులో ఐదుగురు భారతీయ జాతీయులు ఉన్నారు. దురదృష్టవశాత్తూ వారిలో నలుగురు ఈ ఘోర ప్రమాదానికి బలికాగా, ఒకరు ఆసుపత్రిలో ప్రాణాలతో పోరాడుతున్నారు. ఉక్రెయిన్ సంక్షోభం మధ్య అంతర్జాతీయ సముద్ర రవాణా మార్గంలో జరిగిన ఈ దాడి ప్రపంచవ్యాప్తంగా తీవ్ర కలకలం రేపింది.

ఈ దారుణ ఉదంతంపై భారత విదేశాంగ శాఖ తీవ్ర దిగ్భ్రాంతి వ్యక్తం చేస్తూ, దాడిని అత్యంత తీవ్ర పదజాలంతో ఖండించింది. అంతర్జాతీయ నిబంధనలను ఉల్లంఘిస్తూ వాణిజ్య నౌకలను లక్ష్యంగా చేసుకోవడం, అమాయక పౌర సిబ్బంది ప్రాణాలను ప్రమాదంలో పడేయడం, సముద్రయాన స్వేచ్ఛకు , అంతర్జాతీయ వాణిజ్యానికి ఆటంకం కలిగించడం అత్యంత విచారకరమని భారత్ పేర్కొంది. ఇలాంటి దాడులు ముమ్మాటికీ ఖండించదగినవని, వీటిని వెంటనే నిలిపివేయాలని కేంద్ర ప్రభుత్వం స్పష్టం చేసింది.

ఈ కష్టసమయంలో మరణించిన భారతీయుల కుటుంబాలకు విదేశాంగ శాఖ తన గాఢ సానుభూతిని ప్రకటించింది. అలాగే గాయపడిన సిబ్బంది త్వరగా కోలుకోవాలని ఆకాంక్షించింది. బాధిత కుటుంబాలకు అండగా నిలిచేందుకు ప్రభుత్వం అన్ని చర్యలు చేపట్టింది. ఉక్రెయిన్‌లోని భారత రాయబార కార్యాలయం అక్కడి పరిస్థితులను నిరంతరం నిశితంగా గమనిస్తోందని, నౌక దాడికి గురైన బాధితులకు అవసరమైన అన్ని రకాల సహాయ సహకారాలను అందించడానికి శరవేగంగా ప్రయత్నాలు చేస్తోందని విదేశాంగ శాఖ తన ప్రకటనలో వెల్లడించింది.