Fake Form-7 Applications: తెలంగాణాలో కొనసాగుతున్న ఓటరు జాబితా సమగ్ర సవరణ (SIR) ప్రక్రియలో పెద్ద ఎత్తున బోగస్ ఫారం-7 పత్రాలు వెలుగుచూస్తుండటం తీవ్రదుమారం రేపుతోంది. నిబంధనల ప్రకారం ఎవరైనా వ్యక్తి మరణించినా లేదా ఇతర ప్రాంతానికి మారినా వారి కుటుంబ సభ్యులు ఫారం-7 సమర్పించాల్సి ఉంటుంది. అయితే, నిబంధనలకు విరుద్ధంగా ముషీరాబాద్ నియోజకవర్గ పరిధిలోని 210 పోలింగ్ కేంద్రంలో 31 మంది ఓటర్ల పేర్లను తొలగించేందుకు నకిలీ పత్రాలు సిద్ధం చేయడం ఇప్పుడు కలకలం సృష్టించింది.
ఈ వ్యవహారంలో బూత్ లెవల్ ఏజెంట్ (BLA) బాలచందర్ అనే వ్యక్తి బోగస్ ఫారం-7 పత్రాలను సమర్పించేందుకు యత్నించినట్లు ఆరోపణలు రావడంతో ముషీరాబాద్ ఈఆర్‌వో (ఓటరు నమోదు అధికారి) ప్రవీణ్‌కుమార్‌రెడ్డి స్థానిక పోలీస్ స్టేషన్ లో ఫిర్యాదు చేశారు. దీనితో పోలీసులు విచారణ చేపట్టనున్నారు. మరోవైపు, బీఎల్‌ఏలకు బీజేపీ పార్టీనే ఈ నకిలీ పత్రాలను అందించిందని కాంగ్రెస్ పార్టీ తీవ్ర ఆరోపణలు చేస్తోంది.
ఈ అక్రమాలపై పూర్తిస్థాయి దర్యాప్తు కోసం ప్రత్యేక దర్యాప్తు బృందాన్ని (SIT) ఏర్పాటు చేయాలంటూ నగర పోలీసు కమిషనర్‌కు ఫిర్యాదు అందింది. పలు నియోజకవర్గాల్లో బోగస్ పత్రాలు బయటపడుతున్న నేపథ్యంలో.. రాష్ట్ర ఎన్నికల అధికారి అప్రమత్తమై జిల్లా అధికారులను హెచ్చరించడంతో ‘సర్’ ప్రక్రియలో కీలక పరిణామాలు చోటుచేసుకుంటున్నాయి.