Donald Trump: “ఆ గౌరవం దక్కించుకున్న ఏకైక యూఎస్ ప్రెసిడెంట్ నేనే”.. తెలంగాణ ప్రభుత్వ నిర్ణయంపై ట్రంప్ ఫిదా!

Donald Trump: హైదరాబాద్ నగరంలో తన పేరు మీద ఒక రోడ్డుకు నామకరణం చేయడంపై అమెరికా అధ్యక్షుడు డొనాల్డ్ ట్రంప్ సంతోషం వ్యక్తం చేశారు. భారతదేశం తనకు అందించిన ఈ గౌరవంపై స్పందిస్తూ, ఇది ఒక “అపూర్వమైన గౌరవం” అని అభివర్ణించారు. ఈ మేరకు ట్రంప్ తన సోషల్ మీడియా ప్లాట్‌ఫామ్ ‘ట్రూత్ సోషల్’ (Truth Social) లో ఒక పోస్ట్‌ను పంచుకున్నారు. హైదరాబాద్‌లో జరిగిన ప్రారంభోత్సవ వేడుకకు సంబంధించిన ఓ ఫోటోను షేర్ చేస్తూ.. “భారతదేశంలోని హైదరాబాద్‌లో కొత్తగా ఏర్పాటైన డొనాల్డ్ ట్రంప్ అవెన్యూ. ఈ రకమైన గౌరవం పొందిన మొట్టమొదటి యూఎస్ ప్రెసిడెంట్ నేనే. ధన్యవాదాలు! – ప్రెసిడెంట్ డొనాల్డ్ జె. ట్రంప్” అంటూ ఆయన కృతజ్ఞతలు తెలిపారు.

అమెరికా రాయబార కార్యాలయం (యూఎస్ కాన్సులేట్) కు ఆనుకుని ఉన్న ఓ ప్రధాన రహదారికి తెలంగాణ ప్రభుత్వం అధికారికంగా డొనాల్డ్ ట్రంప్ అవెన్యూగా పేరు మార్చిన కొద్ది రోజులకే ట్రంప్ నుంచి ఈ స్పందన వచ్చింది. హైదరాబాద్ నగరానికి ఉన్న అంతర్జాతీయ గుర్తింపును మరింత పెంపొందించడానికి, భారత్-అమెరికా మధ్య ఉన్న బలమైన సంబంధాలను చాటిచెప్పడానికి తెలంగాణ ప్రభుత్వం ఈ నిర్ణయం తీసుకుంది. గ్లోబల్ టెక్నాలజీ కంపెనీలు, యూఎస్ డిప్లొమాటిక్ మిషన్ ఉన్న హైదరాబాద్‌ ఫైనాన్షియల్ డిస్ట్రిక్ట్ పరిధిలోని నానక్‌రామ్‌గూడలో ఈ అవెన్యూ ఉంది. హైదరాబాద్‌కు, యునైటెడ్ స్టేట్స్‌కు మధ్య ఉన్న బంధానికి ప్రతీకగానే ఈ నామకరణం చేసినట్లు అధికారులు పేర్కొన్నారు.

అమెరికా స్వాతంత్ర్యానికి 250 ఏళ్లు పూర్తవుతున్న సందర్భంగా నిర్వహించిన వేడుకల్లో భాగంగా ఈ వారంలోనే ఈ రోడ్డు నామఫలకాన్ని ఆవిష్కరించారు. భారత్‌లో అమెరికా రాయబారి సెర్గియో గోర్ (Sergio Gor) తో పాటు తెలంగాణ ప్రభుత్వ ఉన్నతాధికారుల సమక్షంలో ఈ కార్యక్రమం వైభవంగా జరిగింది. హైదరాబాద్‌లోని కీలకమైన రహదారులు, ప్రభుత్వ మౌలిక సదుపాయాలకు ప్రపంచవ్యాప్తంగా గుర్తింపు పొందిన ప్రముఖులు, సంస్థల పేర్లు పెట్టాలని తెలంగాణ ప్రభుత్వం భావించింది. అందులో భాగంగానే ఈ నిర్ణయం తీసుకున్నారు. గతంలో యూఎస్-ఇండియా స్ట్రాటజిక్ పార్టనర్‌షిప్ ఫోరమ్‌లో ముఖ్యమంత్రి ఎ. రేవంత్ రెడ్డి మాట్లాడుతూ.. హైదరాబాద్‌ను అంతర్జాతీయ స్థాయి ల్యాండ్‌మార్క్‌లతో తీర్చిదిద్దుతామని ప్రకటించారు. కాగా, ఒక అమెరికా అధ్యక్షుడికి భారత్‌లో ఈ తరహా గౌరవం దక్కడం ఇదే తొలిసారి కావడంతో, ట్రంప్ చేసిన ఈ పోస్ట్ నెట్టింట విపరీతంగా ట్రెండ్ అవుతోంది.