Layoffs: లేఆఫ్స్ బాటలో డిస్నీ.. నెట్‌ఫ్లిక్స్, అమెజాన్ పోటీ తట్టుకోలేక కీలక నిర్ణయం..

డిస్నీ సంస్థ తన వార్షిక ఖర్చుల్లో 20 శాతం పొదుపు సాధించడమే లక్ష్యంగా వేలాది ఉద్యోగాల్లో కోతలు విధించడంతో పాటు ఇతర వ్యయాలను తగ్గించుకోవడానికి సిద్ధమవుతోంది. సాంప్రదాయ టెలివిజన్ విభాగం నుంచి వచ్చే ఆదాయం గణనీయంగా పడిపోవడం, ఆన్‌లైన్ స్ట్రీమింగ్ చందాదారుల పెరుగుదల మందగించడమే ఈ నిర్ణయానికి ప్రధాన కారణం. బ్లూమ్‌బెర్గ్ నివేదిక ప్రకారం.. సంస్థ నిర్దేశించుకున్న ఈ పొదుపు లక్ష్యం వల్ల డిస్నీకి చెందిన థీమ్ పార్కులు, టెలివిజన్ ఛానెళ్లు, ఫిలిం స్టూడియోలపై తీవ్ర ప్రభావం పడే అవకాశం ఉంది. ప్రపంచవ్యాప్తంగా దాదాపు 2,31,000 మంది ఉద్యోగులు కలిగిన ఈ వినోద దిగ్గజ సంస్థ, గతంలో కూడా ఖర్చులను తగ్గించుకోవడంలో భాగంగా ఏబీసీ, పిక్సార్, ఈఎస్పీఎన్, ఇతర అనుబంధ విభాగాలలో వేలాది మందిని ఉద్యోగాల నుంచి తొలగించింది.

ప్రస్తుత ఆర్థిక సంవత్సరంలో వాటాదారులకు ప్రతి షేరుపై వచ్చే సర్దుబాటు ఆదాయంలో రెండంకెల వృద్ధిని అందిస్తామని డిస్నీ హామీ ఇచ్చింది. ఈ క్రమంలోనే సంస్థ ముఖ్య కార్యనిర్వాహక అధికారి జోష్ డి’అమారో పొదుపు ద్వారా లభించే నిధులలో కొంత భాగాన్ని సినిమాలు, టీవీ కార్యక్రమాలు, సాంకేతికత, థీమ్ పార్కులు, క్రూజ్ షిప్ వ్యాపార విస్తరణలో తిరిగి పెట్టుబడి పెట్టాలని ప్రణాళికలు రచిస్తున్నారు. ఉద్యోగుల తొలగింపు ప్రతిపాదనలపై స్పందించడానికి డిస్నీ ప్రతినిధులు నిరాకరించినప్పటికీ, సంస్థ అంతర్గత పునర్నిర్మాణ చర్యలు ఇప్పటికే వేగవంతమయ్యాయి.

కేవలం డిస్నీ మాత్రమే కాకుండా వినోద రంగానికి చెందిన నెట్‌ఫ్లిక్స్, సోనీ పిక్చర్స్, పారామౌంట్, వార్నర్ బ్రదర్స్ వంటి ఇతర దిగ్గజ సంస్థలు కూడా మార్కెట్ ఒత్తిడిని ఎదుర్కొంటున్నాయి. ఒకవైపు సాంప్రదాయ టీవీల మార్కెట్ పడిపోవడం, మరోవైపు సోషల్ మీడియా ప్లాట్‌ఫామ్‌లు, అమెజాన్, యాపిల్ వంటి దిగ్గజ టెక్ కంపెనీల నుంచి డిజిటల్ రంగంలో గట్టి పోటీ ఎదురవుతుండటంతో ఈ సంస్థలన్నీ ఖర్చుల నియంత్రణ బాట పట్టాయి. ప్రస్తుత మారుతున్న సాంకేతిక యుగంలో ముందుకు సాగాలంటే వ్యాపార పరిమాణాన్ని, నిర్వహణ నిర్మాణాన్ని ఎప్పటికప్పుడు సమీక్షించుకోవడం చాలా అవసరమని డిస్నీ ప్రతినిధులు అభిప్రాయపడుతున్నారు. ఉద్యోగాల కోత, వ్యయాల తగ్గింపు చర్యలతో వ్యాపారాన్ని మళ్లీ లాభాల బాట పట్టించి, కొత్త రంగాల్లో విస్తరించాలని డిస్నీ భావిస్తోంది.