Abhijit Dipke: “రండి, మమ్మల్ని అరెస్ట్ చేయండి”.. విమానంలో అభిజీత్ దిప్కే హల్‌చల్

Abhijit Dipke: ఢిల్లీలోని జంతర్ మంతర్ వద్ద కాక్రోచ్ జనతా పార్టీ (CJP) తలపెట్టిన నిరసన కార్యక్రమానికి వెళ్లకుండా ఆ పార్టీ వ్యవస్థాపకుడు అభిజీత్ దిప్కేతో పాటు సౌరవ్ దాస్, అశుతోష్ రాంకాలలను ఢిల్లీ పోలీసులు ఏకంగా విమానంలోనే అదుపులోకి తీసుకోవడం కలకలం రేపింది. ముంబై నుంచి ఢిల్లీకి చేరుకున్న విమానం ల్యాండ్ అవగానే, పోలీసుల బృందం నేరుగా ఫ్లైట్ లోపలికి ప్రవేశించి ఈ హైడ్రామాకు తెరతీసింది. పోలీసులు విమానం ఎక్కిన వెంటనే అభిజీత్ దిప్కే తన ఇన్‌స్టాగ్రామ్‌లో లైవ్ వీడియో ద్వారా ఈ దృశ్యాలను షేర్ చేశారు. “మేము విమానం దిగే వరకు కొంచెం కూడా ఆగలేరా? రండి, మమ్మల్ని అరెస్ట్ చేయండి, మేమేమి భయపడటం లేదు” అంటూ ఫ్లైట్‌లోని మహిళా పోలీసులతో దీప్కే వాగ్వాదానికి దిగినట్లు ఆ వీడియోలో స్పష్టంగా కనిపిస్తోంది. చీఫ్ ఎలక్షన్ కమిషనర్ జ్ఞానేశ్ కుమార్‌కు వ్యతిరేకంగా జంతర్ మంతర్ వద్ద జరగాల్సిన నిరసనలో పాల్గొనేందుకే అభిజీత్ ముంబై నుంచి ఢిల్లీ బయలుదేరారు.

ఈ ముందస్తు అరెస్టులను సీజేపీ తీవ్రంగా ఖండించింది. అభిజీత్ దిప్కే, సౌరవ్ దాస్, అశుతోష్ రాంకాలలను విమానం దిగకముందే బలవంతంగా అదుపులోకి తీసుకోవడం అత్యంత అప్రజాస్వామికమని, శాంతియుత నిరసనలను అణచివేసే కుట్రలో భాగంగానే ఢిల్లీ పోలీసులు ఈ ప్రీ-ప్లాన్డ్ చర్యకు పాల్పడ్డారని సీజేపీ ఓ ప్రకటనలో ఆరోపించింది. పౌరుల భావప్రకటన స్వేచ్ఛను, ప్రయాణ స్వేచ్ఛను కాలరాస్తున్నారని మండిపడుతూ, వీరందరినీ తక్షణమే బేషరతుగా విడుదల చేయాలని డిమాండ్ చేసింది. ఈ నిరసనలను ఎక్కడికక్కడ అణచివేయడానికి పోలీసులు భారీ ఎత్తున చర్యలు చేపట్టారు. ఇందులో భాగంగానే ఉదయాన్నే ప్రముఖ యూట్యూబర్ ధ్రువ్ రాఠీ, సీజేపీ లీగల్ సెల్ హెడ్ రత్నా సింగ్‌లను కూడా పోలీసులు అదుపులోకి తీసుకున్నారు. కేవలం వీళ్లే కాకుండా, నిన్న రాత్రి నుంచి ఢిల్లీ వ్యాప్తంగా వివిధ ప్రాంతాల్లో సుమారు 400 మందికి పైగా అనుమానిత నిరసనకారులను పోలీసులు అదుపులోకి తీసుకున్నారు.

ఈ నిరసనకు ముందస్తు అనుమతి కోరలేదనే కారణంతో శుక్రవారమే ఢిల్లీ పోలీసులు దీనిని తిరస్కరించిన విషయం తెలిసిందే. ఏదేమైనా, ఈ నిరసనను పూర్తిగా అడ్డుకోవడానికి ఢిల్లీలో ఎన్నడూ లేనివిధంగా భారీ ఆంక్షలు విధించారు. నగరంలో శాంతిభద్రతల పరిరక్షణ కోసం కేంద్ర ప్రభుత్వం ఏకంగా 30 వేలకు పైగా పోలీసులను, సెంట్రల్ ఆర్మ్డ్ పోలీస్ ఫోర్సెస్ (CAPF) బలగాలను రంగంలోకి దించింది. అంతేకాకుండా, నిరసనకారుల రాకపోకలను పూర్తిగా నిలిపివేసేందుకు ఏకంగా 45 మెట్రో స్టేషన్లను మూసివేయడంతో పాటు డజన్ల కొద్ది రైళ్లను రద్దు చేశారు.