Delhi: లాయర్స్ vs కాప్స్.. రోడ్డెక్కిన 150 మంది పోలీసులు.. ఏసీపీ మనస్వి వశిష్ఠపై సస్పెన్షన్ వేటు

Delhi ACP Manasvi Vashisht Suspended: ఢిల్లీ పోలీసు ప్రధాన కార్యాలయం బయట ఇటీవల జరిగిన అరుదైన నిరసనకు నాయకత్వం వహించిన అసిస్టెంట్ కమిషనర్ ఆఫ్ పోలీస్ (ACP) మనస్వి వశిష్ఠను సస్పెండ్ చేశారు. అక్టోబర్ 23న షాదరా పోలీస్ స్టేషన్‌లో న్యాయవాదులకు, పోలీసులకు మధ్య జరిగిన ఘర్షణ తర్వాత తనపై, తోటి అధికారిపై తీసుకున్న శాఖాపరమైన చర్యలను నిరసిస్తూ ఆయన ఈ ఆందోళనకు దిగారు. షాదరా పోలీస్ స్టేషన్ ఘటన తర్వాత ఏసీపీ మనస్వి వశిష్ఠ, ఆ స్టేషన్ హౌస్ ఆఫీసర్ (SHO) ఇన్‌స్పెక్టర్ అరుణ్ కుమార్‌లను వేరే ప్రాంతాలకు బదిలీ చేశారు. దీన్ని వ్యతిరేకిస్తూ మహిళా అధికారులు సహా సుమారు 150 మంది ఢిల్లీ పోలీసులు సోమవారం నాడు ఢిల్లీ పోలీసు హెడ్‌క్వార్టర్స్ బయట వినూత్న రీతిలో నిరసన చేపట్టారు. ఏసీపీ వశిష్ఠ, ఇన్‌స్పెక్టర్ అరుణ్ కుమార్‌లను మళ్లీ వారి పాత పోస్టులకే కేటాయించాలని ఆందోళనకారులు డిమాండ్ చేశారు.

ఈ నిరసనలో భాగంగా పోలీసుల బృందం పోలీసు కమిషనర్ అనురాగ్ కుమార్‌ను కలిసి ఐదు ప్రధాన డిమాండ్లతో వినతిపత్రం సమర్పించింది. షాదరా ఘటనలో ప్రమేయం ఉన్న న్యాయవాదులపై చర్యలు తీసుకోవాలని, అలాగే రౌడీయిజానికి పాల్పడే లాయర్లపై ఎఫ్‌ఐఆర్‌లు నమోదు చేయాలని ఆ డిమాండ్లలో కోరారు. పోలీసుల మనోధైర్యాన్ని దెబ్బతీయకుండా సత్వర తగిన చర్యలు తీసుకుంటామని కమిషనర్ ఈ సందర్భంగా వారికి హామీ ఇచ్చారు. నిరసనకారులు “వర్దీ కా అప్మాన్ నహీ సహేంగే” (యూనిఫాం అవమానాన్ని సహించబోం) అంటూ ప్లకార్డులు పట్టుకుని నినాదాలు చేశారు. ప్రధాన కార్యాలయం 1వ గేట్ వద్ద ఉద్రిక్త పరిస్థితులు నెలకొనడంతో న్యూఢిల్లీ డీసీపీ సచిన్ శర్మ అక్కడికి చేరుకుని పోలీసులను సముదాయించే ప్రయత్నం చేశారు. కొందరిని లోపలికి రావాల్సిందిగా కోరినా వారు తిరస్కరించి, పోలీసు కమిషనర్‌తో నేరుగా ‘సంపర్క్ సభ’ నిర్వహించాలని పట్టుబట్టడంతో చివరకు అదే విధంగా సమావేశం జరిగింది.

ఈ నిరసనకు సంబంధించిన పిలుపును ఢిల్లీ పోలీసుల వాట్సాప్ గ్రూపుల ద్వారానే సర్క్యులేట్ చేసినట్లు పీటీఐ వార్తా సంస్థ తెలిపింది. తమ సిబ్బంది ఎవరూ ఈ నిరసనలో పాల్గొనకుండా చూడాలని జిల్లా డీసీపీలు, యూనిట్ హెడ్స్‌కు ముందే ఆదేశాలు జారీ అయినప్పటికీ, ఇది పూర్తిగా పోలీసు సిబ్బందీ స్వచ్ఛందంగా ఇచ్చిన పిలుపేనని, తాను కేవలం వారిలో భాగస్వామినయ్యానని ఏసీపీ వశిష్ఠ మీడియాతో చెప్పారు. ఇక, అక్టోబర్ 23న షాదరా పోలీస్ స్టేషన్‌లో పోలీసులు, లాయర్ల మధ్య జరిగిన తోపులాటలో అడ్వకేట్ లలిత్ బన్సల్ తలకు తీవ్ర గాయాలయ్యాయి. ఈ ఘటనపై చర్యలు తీసుకోవాలని డిమాండ్ చేస్తూ స్థానిక న్యాయవాదులు పోలీస్ స్టేషన్‌ను ముట్టడించారు. పోలీసులు తమను బెదిరించారని, దురుసుగా ప్రవర్తించారంటూ లాయర్లు ఆరోపించారు. ఈ ఉద్రిక్తతలను తగ్గించేందుకు ఢిల్లీలోని అన్ని జిల్లా కోర్టుల బార్ అసోసియేషన్ల సమన్వయ కమిటీ నిరసనగా నిరవధిక సమ్మెకు పిలుపునిచ్చింది. ఈ వివాదానికి తెరదించే ప్రయత్నంలో భాగంగానే పోలీసు యంత్రాంగం ఏసీపీ వశిష్ఠను, ఇన్‌స్పెక్టర్ అరుణ్ కుమార్‌లను బదిలీ చేసింది. షాదరా బార్ అసోసియేషన్ దాఖలు చేసిన ఎఫ్‌ఐఆర్‌లు, ఫిర్యాదులపై రెండు నెలల్లో దర్యాప్తు జరుపుతామని హామీ ఇవ్వడంతో న్యాయవాదులు తమ సమ్మెను విరమించుకున్నారు.