Cyber Fraud : క్వికర్ క్విజ్.. నమ్మితే నిండా మునిగినట్టే.. లక్షన్నర కాజేసిన సైబర్ కేటుగాళ్లు..!

Cyber Fraud : సికింద్రాబాద్‌లో ఒక మహిళ తన ఫ్లాట్‌ను అద్దెకు ఇవ్వాలని ఆన్‌లైన్‌లో ప్రకటన ఇచ్చింది. క్వికర్ యాప్‌లో పెట్టిన ఆ ప్రకటనకు ఓ కేటుగాడు కన్నేశాడు. ఫోన్ చేసి తాను ఆర్మీ అధికారిని అని చెప్పి నమ్మబలికాడు. ఫ్లాట్ చాలా బాగుందని, అద్దెకు తీసుకుంటానని చెప్పాడు. అంతేకాదు, ఆర్మీ అకౌంటెంట్ త్వరలోనే మిమ్మల్ని సంప్రదిస్తాడని చెప్పి మరింత నమ్మకం కలిగించాడు. ఆ తర్వాత అసలు కథ మొదలైంది. ఆర్మీ చెల్లింపులు రివర్స్ మోడ్‌లో ఉంటాయని, మొదట మీరు కొంత డబ్బు పంపిస్తే.. తాము చెల్లించాల్సిన అద్దెతో కలిపి మీ ఖాతాలో వేస్తామని మాయమాటలు చెప్పాడు. అమాయకమైన ఆ మహిళ వారి మాటలు నమ్మింది. విడతల వారీగా ఏకంగా లక్షా 31 వేల రూపాయలు వారి ఖాతాలోకి ట్రాన్స్‌ఫర్ చేసింది.

డబ్బులు వెళ్లిన కాసేపటికే ఆ “ఆర్మీ అధికారి” ఫోన్ స్విచ్ఛాఫ్ అయింది. అప్పుడు ఆ మహిళకు తాను మోసపోయానని అర్థమైంది. లబోదిబోమంటూ సైబర్ క్రైమ్ పోలీసులకు ఫిర్యాదు చేసింది. ఇదంతా చూస్తుంటే “నమ్మకం ఉంచితే మోసం జరుగుతుంది” అనే సామెత గుర్తుకు వస్తోంది కదూ? టెక్నాలజీ పెరిగిన ఈ రోజుల్లో ఆన్‌లైన్ మోసాలు కూడా అదే స్థాయిలో పెరిగిపోతున్నాయి. అపరిచిత వ్యక్తుల మాటలు నమ్మి ఇలాంటి ట్రాన్సాక్షన్లు చేసే ముందు ఒకటికి రెండుసార్లు ఆలోచించడం చాలా ముఖ్యం. లేదంటే లక్షలు కాజేసే ఇలాంటి సైబర్ కేటుగాళ్ల చేతిలో నిండా మునగాల్సి వస్తుంది..