Drugs: ఆపరేషన్ గరుడ.. విశాఖ సీపోర్ట్‌లో 25వేల కేజీల డ్రగ్స్ స్వాధీనం

Drugs: ‘ఆపరేషన్‌ గరుడ’లో భాగంగా డ్రై ఈస్ట్‌తో మిక్స్‌ చేసిన దాదాపు 25వేల కేజీల డ్రగ్స్‌ను సీబీఐ స్వాధీనం చేసుకుంది. డ్రగ్స్‌ను కలిగి ఉన్న షిప్పింగ్ కంటైనర్‌ను అదుపులోకి తీసుకుని.. మొత్తం సరుకును సీజ్‌ చేసి, కేసు నమోదు చేశారు. “ఆపరేషన్ గరుడ”లో భాగంగా అంతర్జాతీయ స్థాయిలో వ్యవస్థీకృత డ్రగ్స్ కార్టెల్స్‌పై పోరాటంలో భాగంగా ఇంటర్‌పోల్ ద్వారా అందిన సమాచారంతో విశాఖ కస్టమ్స్ డిపార్ట్‌మెంట్ సహాయంతో విశాఖపట్నం ఓడరేవులోని షిప్పింగ్ కంటైనర్‌ను సీబీఐ అదుపులోకి తీసుకుంది. ఈ కంటైనర్‌ను భారతదేశంలోని విశాఖపట్నంలో డెలివరీ చేయడానికి “శాంటోస్ పోర్ట్, బ్రెజిల్” నుండి విశాఖపట్నం ఆధారిత ప్రైవేట్ కంపెనీ అయిన కన్సిగ్నీ పేరుతో బుక్ చేయబడింది. కంటైనర్‌లో 25,000 వేల కిలోల డ్రగ్స్‌ ఉన్నట్లు తెలిసింది. బ్రెజిల్ నుంచి విశాఖ తీరానికి ఈ కంటైనర్‌ వచ్చింది.

Read Also: Madhya Pradesh: భోజ్‌శాల ఆలయం-కమల్ మౌలా మసీదుపై రేపటి నుంచి ఏఎస్ఐ సర్వే..

అయితే, ప్రాథమిక పరీక్షలో, నార్కోటిక్స్ పదార్ధాలను గుర్తించే యంత్రాంగాల ద్వారా, రవాణా చేయబడిన మెటీరియల్‌లో ఇన్‌యాక్టివ్ డ్రైడ్ ఈస్ట్‌తో కలిపిన నార్కోటిక్ డ్రగ్స్ ఉన్నట్లు తెలుస్తోంది. మొత్తం సరుకును స్వాధీనం చేసుకున్నారు. అడ్రస్ ఆధారంగా సీబీఐ కేసు నమోదు చేసింది. సాధారణంగా కట్టింగ్ ఏజెంట్లు అని పిలువబడే ఇతర పదార్ధాలతో కలపడం ద్వారా మాదక ద్రవ్యాలను దిగుమతి చేసుకోవడంలో అంతర్జాతీయ నేర నెట్‌వర్క్ ప్రమేయాన్ని ఆపరేషన్ సూచిస్తుంది. గతంలో కూడా, ఇంటర్‌పోల్ ఇన్‌పుట్‌ల ఆధారంగా అంతర్జాతీయ స్థాయిలో మాదకద్రవ్యాల మహమ్మారిని ఎదుర్కోవడంలో తన నిబద్ధతను కొనసాగించడానికి సీబీఐ ఎన్‌డీపీఎస్ చట్టం కింద కార్యకలాపాలు నిర్వహించింది. నేరాలను నమోదు చేసింది. ఈ విషయంలో తదుపరి విచారణ కొనసాగుతోంది.