నేడు AFG vs IND ఏకైక టెస్ట్ మ్యాచ్.. టీమిండియా ప్లేయింగ్ XI ఇలా.!

AFG vs IND Playing XI: భారత్-అఫ్గానిస్థాన్ మధ్య నేడు (జూన్ 6) న్యూ చండీగఢ్‌ లోని న్యూ పీసీఏ స్టేడియంలో ఏకైక టెస్ట్ మ్యాచ్ ప్రారంభంకానుంది. ఈ మ్యాచ్ ద్వారా న్యూ చండీగఢ్ స్టేడియం తొలిసారిగా టెస్ట్ క్రికెట్‌కు ఆతిథ్యం ఇవ్వనుంది. ఇప్పటి వరకు ఐపీఎల్ 2026 మ్యాచ్‌ లతో సందడిగా కనిపించిన ఈ వేదిక ఇప్పుడు టెస్ట్ క్రికెట్‌కు ఆతిథ్యం ఇవ్వబోతుంది. టీమిండియా కూడా చాలా కాలం తర్వాత టెస్ట్ క్రికెట్‌లోకి అడుగుపెడుతోంది. గత ఏడాది నవంబర్‌లో దక్షిణాఫ్రికాతో జరిగిన టెస్ట్ అనంతరం మళ్లీ తెల్ల దుస్తుల్లో బరిలోకి దిగుతోంది. ఐపీఎల్ ఫైనల్ ముగిసిన కేవలం ఆరు రోజులకే ఈ టెస్ట్ ప్రారంభమవుతుండటంతో ఆటగాళ్లకు వైట్ బాల్ నుంచి రెడ్ బాల్ క్రికెట్‌కు మారడం సవాల్‌గా మారింది. భారత జట్టులోని 15 మంది సభ్యుల్లో ఎనిమిది మంది ఇటీవలే ఐపీఎల్ ఫైనల్‌లో ఆడినవారే.

ఈ మ్యాచ్ ప్రపంచ టెస్ట్ ఛాంపియన్‌షిప్ (WTC)లో భాగం కాకపోయినా.. దాన్ని తేలికగా తీసుకునే ప్రసక్తే లేదని భారత ప్రధాన కోచ్ గౌతమ్ గంభీర్ స్పష్టం చేశారు. జట్టు పూర్తి స్థాయిలో విజయం కోసం పోరాడుతుందని పేర్కొన్నారు. ఇక అఫ్గానిస్థాన్‌కు ఇది 2018లో టెస్ట్ హోదా పొందిన తర్వాత 13వ టెస్ట్ మ్యాచ్ ఆడబోతుంది. తొలి టెస్ట్‌లో భారత్ చేత బెంగళూరులో రెండు రోజుల్లోనే ఇన్నింగ్స్ తేడాతో ఓడిన అఫ్గాన్ జట్టు, ఈసారి మెరుగైన ప్రదర్శన చేయాలనే లక్ష్యంతో బరిలోకి దిగుతోంది. స్టార్ లెగ్ స్పిన్నర్ రషీద్ ఖాన్ అందుబాటులో లేకపోయినా.. కెప్టెన్ హష్మతుల్లా షాహిదీ జట్టుపై పూర్తి నమ్మకం వ్యక్తం చేశాడు. కొత్త హెడ్ కోచ్ రిచర్డ్ పైబస్‌కు కూడా ఇది తొలి అసైన్‌మెంట్.

భారత్ జట్టులో సాయి సుదర్శన్ నెం. 3 స్థానంలో కొనసాగనున్నాడు. దీనితో దేవదత్ పడిక్కల్‌కు మరోసారి నిరీక్షణ తప్పలేదు. అలాగే ఎడమచేతి స్పిన్ ఆల్‌రౌండర్లైన హర్ష్ దూబే లేదా మానవ్ సుతార్‌లో ఒకరు టెస్ట్ అరంగేట్రం చేసే అవకాశం ఉంది. మరోవైపు నితీశ్ కుమార్ రెడ్డికి ఈ మ్యాచ్‌లో చోటు దక్కే అవకాశాలు తక్కువగా కనిపిస్తున్నాయి. మరోవైపు అఫ్గానిస్థాన్ జట్టులో మిడిల్ ఆర్డర్ బ్యాటర్ రహ్మానుల్లా, ఎడమచేతి స్పిన్ ఆల్‌రౌండర్ నంగేయాలియా ఖరోటేలకు టెస్ట్ అరంగేట్రం చేసే అవకాశం ఉంది.

పిచ్ విషయానికి వస్తే.. నల్ల మట్టితో తయారైన ఈ వికెట్ బ్యాటర్లకు అనుకూలంగా ఉండనుంది. అయితే జూన్ నెలలో ఉత్తర భారతదేశంలో తీవ్ర ఎండలు ఉండటంతో మధ్యాహ్నం ఉష్ణోగ్రతలు 40 డిగ్రీల సెల్సియస్ వరకు చేరే అవకాశం ఉంది. దీంతో ఆటగాళ్ల ఫిట్‌నెస్, సహనానికి కూడా ఈ మ్యాచ్ పరీక్షగా మారనుంది.

భారత్ ప్లేయింగ్ XI (అంచనా):

యశస్వి జైస్వాల్, కేఎల్ రాహుల్, బి సాయి సుదర్శన్, శుభ్‌మన్ గిల్ (C), రిషభ్ పంత్ (WC), ధృవ్ జురెల్, వాషింగ్టన్ సుందర్, హర్ష్ దూబే/మానవ్ సుతార్, కుల్దీప్ యాదవ్, మహ్మద్ సిరాజ్, ప్రసిద్ధ్ కృష్ణ.

అఫ్గానిస్థాన్ ప్లేయింగ్ XI (అంచనా):

సెదీకుల్లా అతల్, రహ్మానుల్లా గుర్బాజ్, రహ్మత్ షా, హష్మతుల్లా షాహిదీ (C), అజ్మతుల్లా ఒమర్జాయ్, రహ్మానుల్లా, అఫ్సర్ జజాయ్ (WC), షరఫుద్దీన్ అష్రఫ్, నంగేయాలియా ఖరోటే, ఖైస్ అహ్మద్, జియౌర్ రెహ్మాన్.