Abhishek Sharma: సూర్యకుమార్ ప్రపంచ రికార్డుపై కాటేరమ్మకొడుకు కన్ను..

Abhishek Sharma: ఇండోర్‌లోని హోల్కర్ స్టేడియం వేదికగా జరగనున్న మ్యాచ్ మరో చారిత్రక క్షణానికి సిద్ధమైంది. నేటి మ్యాచ్‌లో విధ్వంసకర ఓపెనర్ కాటేరమ్మకొడుకు అభిషేక్ శర్మ బ్యాట్ ఝుళిపిస్తే, టీమిండియా టీ20 స్టార్ సూర్యకుమార్ యాదవ్ పేరిట ఉన్న ప్రపంచ రికార్డు కరిగిపోనుంది. అంతర్జాతీయ టీ20 క్రికెట్‌లో అత్యంత తక్కువ బంతుల్లో రెండు వేల పరుగులు పూర్తి చేసిన ఘనత ప్రస్తుతం సూర్యకుమార్ యాదవ్ పేరిట ఉంది. 2026లో భారత్‌ను టీ20 ప్రపంచ కప్ విజేతగా నిలిపిన సూర్య.. తన ఇన్నింగ్స్‌లో 1,164వ బంతికి ఈ మైలురాయిని అందుకున్నాడు. ఈ జాబితాలో ఆస్ట్రేలియా ప్లేయర్ ఆరోన్ ఫించ్ (1,283 బంతులు), గ్లెన్ మాక్స్వెల్ (1,304 బంతులు) తర్వాతి స్థానాల్లో ఉన్నారు. అయితే నేడు అభిషేక్ శర్మ ఈ రికార్డును బద్దలు కొట్టే అవకాశం ఉంది.

కేవలం రెండు వేల పరుగుల రికార్డే కాకుండా, ఒక కాలెండర్ ఇయర్‌లో అత్యధిక సిక్సర్లు బాదిన రికార్డుపై కూడా అభిషేక్ కన్నేశాడు. 2026లో ఇప్పటివరకు 31 మ్యాచ్‌లు ఆడిన అభిషేక్ 63 సిక్సర్లు కొట్టాడు. ఫుల్ మెంబర్ దేశాల ఆటగాళ్లలో ఒకే ఏడాదిలో అత్యధిక సిక్సర్ల రికార్డును అధిగమించడానికి అతనికి కేవలం ఆరు సిక్సర్లు మాత్రమే అవసరం. ప్రస్తుతం ఈ రికార్డు కూడా 2022లో 31 మ్యాచ్‌ల్లో 68 సిక్సర్లు బాదిన సూర్యకుమార్ పేరిటే ఉంది. కేవలం ఇంటర్నేషనల్ వేదికపైనే కాకుండా ఈ ఏడాది ఓవరాల్ టీ20 మ్యాచ్‌ల్లోనూ అభిషేక్ విజృంభిస్తున్నాడు. వివిధ జట్ల తరఫున ఈ ఏడాది 46 టీ20ల్లో 106 సిక్సర్లు బాదిన అతను, తన సొంత రికార్డును తానే బ్రేక్ చేయడానికి కేవలం మూడు సిక్సర్ల దూరంలో ఉన్నాడు. గత ఏడాది 2025లో భారత్, పంజాబ్, సన్‌రైజర్స్ హైదరాబాద్ తరఫున 41 మ్యాచ్‌ల్లో 108 సిక్సర్లు బాదిన రికార్డు ఏ భారత బ్యాటర్కైనా ఇదే అత్యధికం.

నేటి మ్యాచ్‌లో అభిషేక్‌తో పాటు వికెట్ కీపర్ బ్యాటర్ ఇషాన్ కిషన్ కూడా మరో భారీ రికార్డుపై కన్నేశాడు. ఈ ఏడాది అద్భుతమైన ఫామ్‌లో ఉన్న ఇషాన్, 2026లో ఇప్పటివరకు 31 టీ20 అంతర్జాతీయ మ్యాచ్‌ల్లో 1,085 పరుగులు సాధించాడు. నేటి మ్యాచ్‌లో కనీసం 80 పరుగులు చేస్తే, ఒక కాలెండర్ ఇయర్‌లో భారత్ తరఫున అత్యధిక టీ20 అంతర్జాతీయ పరుగులు చేసిన బ్యాటర్‌గా నిలుస్తాడు. ఈ రికార్డును కూడా 2022లో 31 మ్యాచ్‌ల్లో 1,164 పరుగులు చేసిన సూర్యకుమార్ యాదవ్ యే సృష్టించారు. ఇదే ఫామ్‌లో ఈ ఏడాది అభిషేక్ శర్మ 31 మ్యాచ్‌ల్లో 852 పరుగులు చేసి విరాట్ కోహ్లీ (2022లో 781 పరుగులు) రికార్డును వెనక్కి నెట్టగా, గత ఏడాది 21 మ్యాచ్‌ల్లో 859 పరుగులు సాధించాడు.