Cheteshwar Pujara: భారత్‌లో కూడా క్రిస్ గేల్ ఉన్నాడు.. చతేశ్వర్ పుజారా ఆసక్తికర వ్యాఖ్యలు..

భారత యువ ఓపెనర్ అభిషేక్ శర్మ టీ20 అంతర్జాతీయ క్రికెట్‌లో అత్యంత వేగంగా రెండు వేల పరుగులు పూర్తి చేయడం పట్ల టీమిండియా మాజీ దిగ్గజ బ్యాట్స్ మన్ చేతేశ్వర్ పుజారా ఆశ్చర్యం వ్యక్తం చేశారు. ఇండోర్ వేదికగా వెస్టిండీస్‌తో జరిగిన మూడో టీ20 మ్యాచ్‌లో అభిషేక్ ఈ అరుదైన మైలురాయిని అందుకున్నాడు. ఈ మ్యాచ్‌లో కేవలం 30 బంతుల్లోనే 6 ఫోర్లు, 5 సిక్సర్ల సాయంతో 69 పరుగుల విధ్వంసకర ఇన్నింగ్స్ ఆడాడు.

ఈ మ్యాచ్‌లో భారత్ 223 పరుగులు చేసి 14 పరుగుల తేడాతో విజయం సాధించింది. భారత్ తరఫున కేవలం 65 మ్యాచ్‌లలోనే 2036 పరుగులు చేసిన అభిషేక్, 32.83 సగటు, 195.95 స్ట్రైక్ రేట్‌ను కలిగి ఉన్నాడు. అత్యంత తక్కువ బంతుల్లో (1024 బంతుల్లో) రెండు వేల పరుగులు పూర్తి చేసిన ప్రపంచ రికార్డును ఆయన సృష్టించాడు. ఇంతకుముందు ఈ రికార్డు సూర్యకుమార్ యాదవ్ (1164 బంతుల్లో) పేరిట ఉండేది. 2024 జూలైలో అరంగేట్రం చేసిన అభిషేక్ తక్కువ కాలంలోనే ఈ ఘనత సాధించడం విశేషం.

జియోహాట్‌స్టార్ ‘గేమ్ ప్లాన్’ షోలో పుజారా మాట్లాడుతూ. అభిషేక్ అంత త్వరగా ఈ మైలురాయిని చేరుకుంటాడని ఎవరూ ఊహించలేదని, ప్రస్తుతం అతను భారత్ తరఫున అత్యుత్తమ టీ20 ఆటగాళ్లలో ఒకడిగా నిలిచాడని ప్రశంసించారు. వెస్టిండీస్ దిగ్గజం క్రిస్ గేల్‌లాంటి సత్తా అభిషేక్ సొంతమని, ముఖ్యంగా ఇండోర్ మ్యాచ్‌లో అతను ప్రదర్శించిన పరిణితి అద్భుతమని తెలిపారు. క్రీజులో కొంచెం సమయం గడపడం, తన బ్యాటింగ్ శైలిని మెరుగుపరుచుకోవడం, ఆఫ్ సైడ్ షెడ్యూల్స్‌పై పట్టు సాధించడం అతని విజయానికి కారణమని వివరించారు.

మరోవైపు.. తనపై ప్రత్యర్థి జట్లు ప్రత్యేక వ్యూహాలు రచిస్తున్నప్పటికీ, వాటిని తిప్పికొట్టేలా తన ఆటను మార్చుకుంటున్నానని మ్యాచ్ అనంతరం అభిషేక్ శర్మ పేర్కొన్నారు. వెస్టిండీస్ ఆఫ్ స్పిన్నర్ రోస్టన్ చేజ్ బౌలింగ్‌ను మొదట్లో గౌరవించి, ఆ తర్వాత తనదైన శైలిలో చెలరేగానని తెలిపారు. ప్రస్తుతం ఐదు మ్యాచ్‌ల ఈ టీ20 సిరీస్‌లో భారత్ 2-1 ఆధిక్యంలో కొనసాగుతుండగా, తదుపరి మ్యాచ్ హైదరాబాద్ వేదికగా జరగనుంది.