UP Assembly Elections 2027: యూపీ ఎన్నికల్లో కాంగ్రెస్‌కు 100 సీట్లు కూడా రావు.. ఎస్పీ ఎంపీ సంచలన వ్యాఖ్యలు!

UP Assembly Elections 2027: 2027 ఉత్తరప్రదేశ్ అసెంబ్లీ ఎన్నికలకు ముందే సమాజ్‌వాదీ పార్టీ (SP), కాంగ్రెస్ మధ్య సీట్ల పంపకాల వివాదం మొదలైంది. మొత్తం 403 స్థానాల్లో 181 సీట్లు కావాలని కాంగ్రెస్ డిమాండ్ చేయగా.. 50 నుంచి 65 స్థానాలకే అంగీకరించాలని ఎస్పీ ఎంపీ శివపాల్ సింగ్ పటేల్ సూచించారు. తుది నిర్ణయం అఖిలేశ్ యాదవ్‌దేనని స్పష్టం చేశారు. ఉత్తరప్రదేశ్ రాజకీయాల్లో 2027 అసెంబ్లీ ఎన్నికలకు ముందే పొత్తుల రాజకీయం వేడెక్కుతోంది.

అధికార బీజేపీని ఓడించడమే లక్ష్యంగా సమాజ్‌వాదీ పార్టీ (SP), కాంగ్రెస్ కలిసి ఎన్నికల్లో పోటీ చేయాలని భావిస్తున్నప్పటికీ.. సీట్ల పంపకం విషయంలో ఇరు పార్టీల మధ్య విభేదాలు మొదలయ్యాయి. యూపీలోని మొత్తం 403 అసెంబ్లీ స్థానాల్లో 181 సీట్లు కేటాయించాలని కాంగ్రెస్ డిమాండ్ చేసినట్లు సమాచారం. అయితే ఈ డిమాండ్‌పై సమాజ్‌వాదీ పార్టీ ఎంపీ శివపాల్ సింగ్ పటేల్ తీవ్ర అభ్యంతరం వ్యక్తం చేశారు. కాంగ్రెస్ 50 నుంచి 60 స్థానాలు లేదా గరిష్ఠంగా 65 స్థానాలతోనే సరిపెట్టుకోవాలని సూచించారు.

కాంగ్రెస్ 181 స్థానాల్లో పోటీ చేయాలని కోరినప్పటికీ సీట్ల పంపకం ఇంకా ఖరారు కాలేదని శివపాల్ సింగ్ పటేల్ తెలిపారు. కాంగ్రెస్ తనకు కావాల్సిన స్థానాల జాబితాను మాత్రమే సమర్పించిందని, తుది నిర్ణయం మాత్రం సమాజ్‌వాదీ పార్టీ అధ్యక్షుడు అఖిలేశ్ యాదవ్ తీసుకుంటారని చెప్పారు. కాంగ్రెస్‌కు 100 కంటే తక్కువ సీట్లు మాత్రమే కేటాయించాలని, ఆ పార్టీ 50-60 స్థానాలు లేదా గరిష్ఠంగా 65 స్థానాలకు అంగీకరించడం మంచిదని అభిప్రాయపడ్డారు.

ఉత్తరప్రదేశ్ అసెంబ్లీలో ప్రస్తుతం కాంగ్రెస్‌కు కేవలం ఇద్దరు ఎమ్మెల్యేలు మాత్రమే ఉన్నారని శివపాల్ సింగ్ పటేల్ గుర్తుచేశారు. మరోవైపు సమాజ్‌వాదీ పార్టీ రాష్ట్రంలో బలమైన రాజకీయ శక్తిగా ఉందని పేర్కొన్నారు. ప్రస్తుత రాజకీయ బలాన్ని పరిశీలిస్తే కాంగ్రెస్‌కు 50 సీట్లు కూడా అడిగే అర్హత లేదని ఆయన వ్యాఖ్యానించారు. అలాంటప్పుడు 181 స్థానాలు కోరడం సమంజసం కాదని అభిప్రాయపడ్డారు. కాంగ్రెస్‌కు సామర్థ్యానికి మించి సీట్లు కేటాయిస్తే ఎన్నికల సమయంలో పార్టీ వనరులు వృథా అయ్యే అవకాశం ఉందని హెచ్చరించారు.

సీట్ల పంపకంలో కేవలం రాజకీయ లెక్కలే కాకుండా క్షేత్రస్థాయిలో పనిచేస్తున్న పార్టీ కార్యకర్తల కష్టాన్ని కూడా పరిగణనలోకి తీసుకోవాలని శివపాల్ సింగ్ పటేల్ అన్నారు. వెనుకబడిన వర్గాలు, దళితులు, మైనారిటీలతో కూడిన పీడీఏ (PDA) సామాజిక వర్గాల మధ్య సమాజ్‌వాదీ పార్టీ కార్యకర్తలు నిరంతరం పనిచేస్తూ ప్రజల విశ్వాసాన్ని పొందారని తెలిపారు. అలాంటి పరిస్థితుల్లో కాంగ్రెస్‌కు ఎక్కువ స్థానాలు కేటాయిస్తే ఎస్పీ కార్యకర్తల మనోధైర్యం దెబ్బతినే ప్రమాదం ఉందని అభిప్రాయపడ్డారు. అఖిలేశ్ యాదవ్ నాయకత్వం, ఆయన సంక్షేమ పథకాలపై రాష్ట్ర ప్రజలకు నమ్మకం ఉందని పేర్కొన్నారు.

రెండు పార్టీల మధ్య సీట్ల పంపకంపై నవంబర్ 17న సీనియర్ నాయకులు సమావేశం కానున్నారు. ఈ భేటీలో ఎన్ని స్థానాల్లో ఎవరు పోటీ చేయాలనే అంశంపై అధికారికంగా చర్చలు ప్రారంభం కానున్నాయి. కాంగ్రెస్ 181 స్థానాల డిమాండ్ నుంచి వెనక్కి తగ్గకపోయినా తుది నిర్ణయం అఖిలేశ్ యాదవ్‌దేనని శివపాల్ సింగ్ పటేల్ స్పష్టం చేశారు. పార్టీ అధ్యక్షుడి నిర్ణయమే అంతిమమని తెలిపారు.

మరోవైపు, కాంగ్రెస్‌తో కలిసి ఉత్తరప్రదేశ్ అసెంబ్లీ ఎన్నికల్లో పోటీ చేస్తామని సమాజ్‌వాదీ పార్టీ అధినేత అఖిలేశ్ యాదవ్ గతంలో స్పష్టం చేశారు. 403 అసెంబ్లీ స్థానాల్లో 181 సీట్లు కావాలని కాంగ్రెస్ కోరినట్లు ఆయన వెల్లడించారు. అయితే ఇరు పార్టీల ప్రధాన లక్ష్యం అధికారంలో ఉన్న బీజేపీని ఓడించడమేనని పేర్కొన్నారు. సమాజ్‌వాదీ పార్టీ రాష్ట్రంలో కూటమికి ప్రధాన భాగస్వామిగా ఉండటంతో సీట్ల పంపకంలో తనకు అనుకూలమైన ఫార్ములా కోసం గట్టిగా ప్రయత్నించే అవకాశం ఉంది.

2024 లోక్‌సభ ఎన్నికల్లో కూటమికి 43 సీట్లు

గత ఎన్నికల ఫలితాలు కూడా ప్రస్తుతం సీట్ల పంపకంలో కీలకంగా మారనున్నాయి. 2024 లోక్‌సభ ఎన్నికల్లో ఉత్తరప్రదేశ్‌లో మొత్తం 80 స్థానాలకు గాను ఎస్పీ-కాంగ్రెస్ కూటమి 43 స్థానాలను గెలుచుకుంది.

సమాజ్‌వాదీ పార్టీ: 37 స్థానాలు
కాంగ్రెస్: 6 స్థానాలు
కూటమి మొత్తం: 43 స్థానాలు
ఈ విజయంతో రెండు పార్టీల మధ్య పొత్తు మరింత బలపడింది.

2022 అసెంబ్లీ ఎన్నికల్లో కాంగ్రెస్‌కు కేవలం రెండు స్థానాలు

అయితే అసెంబ్లీ ఎన్నికల ఫలితాలను పరిశీలిస్తే కాంగ్రెస్ బలహీనత స్పష్టంగా కనిపిస్తుంది. 2022 ఉత్తరప్రదేశ్ అసెంబ్లీ ఎన్నికల్లో కాంగ్రెస్ 399 స్థానాల్లో పోటీ చేసి కేవలం రెండు స్థానాల్లో మాత్రమే విజయం సాధించింది. అంతకుముందు 2017 ఎన్నికల్లో ఏడు స్థానాలు గెలుచుకుంది. మరోవైపు, సమాజ్‌వాదీ పార్టీ 2022 ఎన్నికల్లో 347 స్థానాల్లో పోటీ చేసి 111 స్థానాలను గెలుచుకుంది. 2017 ఎన్నికల్లో ఆ పార్టీకి 47 స్థానాలు వచ్చాయి. ఈ గణాంకాలే ఇప్పుడు ఇరు పార్టీల మధ్య సీట్ల పంపక చర్చల్లో కీలక పాత్ర పోషించే అవకాశం ఉంది.

కూటమిలోని భాగస్వామ్య పార్టీలు ఒకరికొకరు సహకరించుకోవడం ముఖ్యమని, అయితే సీట్ల పంపకం మాత్రం రాజకీయ బలానికి అనుగుణంగా ఉండాలని శివపాల్ సింగ్ పటేల్ అభిప్రాయపడ్డారు. ఒక పార్టీకి దాని సామర్థ్యానికి మించి స్థానాలు కేటాయిస్తే ఎన్నికల ఫలితాలపై ప్రతికూల ప్రభావం పడే అవకాశం ఉందని హెచ్చరించారు.