TCS Engineer Suicide: TCSలో సీనియర్ల వేధింపులు.. ఉద్యోగి ఆత్మహత్య..

TCS Engineer Suicide: పుణెలోని టాటా కన్సల్టెన్సీ సర్వీసెస్ (TCS) సంస్థలో పనిచేస్తున్న సాఫ్ట్‌వేర్ ఇంజనీర్ 48 ఏళ్ల అమిత్ అభయ్ బ్రహ్మే ఆత్మహత్య చేసుకోవడం కలకలం రేపింది. తన మరణానికి ఆఫీస్‌లో సీనియర్‌ల మానసిక వేధింపులే కారణమని ఆరోపించారు. జూన్ 2న తన నివాసంలో ఆత్మహత్య చేసుకున్న బ్రహ్మే, గదిలో 2 పేజీల సూసైడ్ నోట్‌ను ఉంచారు. పోలీసులు ఈ నోట్‌ను స్వాధీనం చేసుకుని దర్యాప్తు చేస్తున్నారు.

ఇద్దరు సీనియర్ మహిళా ఉద్యోగులు అర్చనా, శశ్వతిలతో పాటు తన స్నేహితుడు వినోద్ పాలిచా తనను తీవ్రంగా వేధించారని ఆరోపించారు. తాను బాగా పనిచేస్తున్నప్పటికీ మంచి ప్రాజెక్టులను ఉద్దేశపూర్వకంగా తన నుంచి తీసేసి, గడువులోగా పూర్తి చేయలేని క్లిష్టమైన ప్రాజెక్టులు ఇచ్చినట్లు ఆరోపించారు. తన సహోద్యోగులు పలుమార్లు అవమానించారని, ఉద్యోగానికి రాజీనామా చేయాలంటూ ఒత్తిడి చేస్తున్నారంటూ నోట్‌లో పేర్కొన్నారు. వినోద్ తన సన్నిహిత మిత్రుడని భావిస్తే, అతనే తనపై తప్పుడు ఫిర్యాదులు చేసి తన ప్రతిష్టను దెబ్బతీశారని అమిత్ ఆరోపించారు.

ఈ కేసులో ముగ్గురు వ్యక్తులు ఆత్మహత్యకు ప్రేరేపించినట్లు కేసు నమోదు చేసినట్లు అసిస్టెంట్ కమిషనర్ సుధాకర్ యాదవ్ తెలిపారు. అన్ని కోణాల్లో దర్యాప్తు చేస్తున్నట్లు చెప్పారు. ప్రస్తుతానికి ఎవరినీ అరెస్ట్ చేయలేదని అన్నారు. అయితే, ఈ ఆత్మహత్యపై ఐటీ ఉద్యోగుల సంఘం తీవ్ర ఆందోళన వ్యక్తం చేసింది. కంపెనీల్లో మానసిక ఒత్తిడి, వేధింపులపై ముఖ్యమంత్రి దేవేంద్ర ఫడ్నవీస్ జోక్యం చేసుకోవాలని కోరారు.