CP Radhakrishnan: దేశానికి తమిళనాడు నుంచి ప్రధాని.. ఉప రాష్ట్రపతి కీలక వ్యాఖ్యలు..

CP Radhakrishnan: భారతదేశానికి భవిష్యత్తులో తమిళనాడు నుంచి ప్రధానిమంత్రి వచ్చే అవకాశం ఉందని ఉప రాష్ట్రపతి సీపీ రాధాకృష్ణన్ అన్నారు. భారత ప్రజాస్వామ్యంలో ప్రతీ పౌరుడికి దేశాన్ని నడిపించే అవకాశం ఉంటుందని, దేశంలోని వివిధ ప్రాంతాలకు చెందిన నాయకులు ఇప్పటికే ప్రధానమంత్రి పదవిని చేపట్టారని ఆయన గుర్తుచేశారు.

శుక్రవారం మదురైలో జరిగిన మీడియా సమావేశంలో అడిగిన ఓ ప్రశ్నకు ఆయన స్పందిస్తూ.. మాజీ ప్రధాని హెచ్‌డీ దేవెగౌడ కర్ణాటక నుంచి వచ్చారని, ప్రస్తుత ప్రధాని మోడీ గుజరాత్ నుంచి వచ్చారని ఆయన అన్నారు. ఇప్పటి వరకు తమిళనాడు నుంచి ఒక్కరు కూడా ప్రధానమంత్రి కాలేదని, రాష్ట్రానికి చెందిన ముగ్గురు వ్యక్తులు రాష్ట్రపతులుగా, మరో ముగ్గురు ఉప రాష్ట్రపతులుగా పనిచేశారని చెప్పారు. ప్రస్తుత ఉప రాష్ట్రపతి రాధాకృ‌ష్ణన్ కూడా తమిళనాడుకు చెందినవారే. 1998 నుంచి 2004 వరకు కోయంబత్తూరు బీజేపీ ఎంపీగా కూడా పనిచేశారు.

తమిళనాడు గవర్నర్ రాజేంద్ర విశ్వనాథ్ అర్లేకర్‌తో కలిసి ఉప రాష్ట్రపతి మదురైలోని మీనాక్షి సుందరేశ్వర ఆలయాన్ని సందర్శించారు. తర్వాత మదురైకి సుమారు 80 కిలోమీటర్ల దూరంలో ఉన్న పసుంపోన్‌లో స్వాతంత్ర్య సమరయోధుడు, ఆధ్యాత్మిక నాయకుడు ముత్తురామలింగ తేవర్ స్మారక స్థలాన్ని సందర్శించారు. ముత్తురామలింగ తేవర్‌ను నేతాజీ సుభాష్ చంద్రబోస్‌కు ప్రధాన అనుచరుడని రాధాకృష్ణన్ అభివర్ణించారు. తమిళ ప్రాంతంలో జాతీయ, ఆధ్యాత్మక చైతన్యం పెంపొందించడంలో ఆయన కీలక పాత్ర పోషించారని అన్నారు. ముఖ్యమంత్రి అయ్యే అవకాశాలు ఉన్నప్పటికీ ముత్తురామలింగ తేవర్ రాజకీయ ప్రయోజనాల కోసం తన సిద్ధాంతాలను, విలువలను ఎప్పుడూ రాజీపడలేదని తెలిపారు.