CM Vijay: మహిళా ఉద్యోగులకు రక్షా బంధన్ శుభవార్త.. మూడో బిడ్డకు ఏడాది ప్రసూతి సెలవు

రక్షా బంధన్‌కు ముందు మహిళా ప్రభుత్వ ఉద్యోగులకు విజయ్ సర్కార్ కానుక ప్రకటించింది. మూడవ బిడ్డకు జన్మనిస్తే ఒక సంవత్సరం ప్రసూతి సెలవు ప్రకటించింది. రాష్ట్రంలోని మహిళా ప్రభుత్వ ఉద్యోగులకు మూడవ బిడ్డ పుట్టినప్పుడు 365 రోజుల ప్రసూతి సెలవు ఇవ్వాలని ప్రభుత్వం నిర్ణయించింది.

మహిళా ఉద్యోగులకు మూడవ బిడ్డ పుట్టినప్పుడు ప్రసూతి సెలవు కాలాన్ని పొడిగించాలని తాజాగా ప్రభుత్వం నిర్ణయం తీసుకుంది. ఈ కాలం మొదటి ఇద్దరు పిల్లలకు ఉన్నదానితో సమానంగా ఉంటుంది. మూడవ బిడ్డకు ప్రసూతి సెలవు ఇప్పుడు 365 రోజులు.. అంటే ఒక సంవత్సరం ఉంటుంది. గతం మూడవ బిడ్డకు ప్రసూతి సెలవు 12 వారాలు అంటే మూడు నెలలకు మాత్రమే పరిమితం ఉండేది.

తమిళనాడు ప్రభుత్వ మానవ వనరుల నిర్వహణ శాఖ మంత్రి డి. శరత్‌కుమార్.. తమ శాఖ గ్రాంట్ల డిమాండ్‌పై జరిగిన చర్చ సందర్భంగా అసెంబ్లీలో మాట్లాడుతూ.. తమిళనాడు ప్రభుత్వం సామాజిక సంక్షేమానికి, మహిళా సాధికారతకు ప్రాధాన్యతనిచ్చే ప్రజా సంక్షేమ ప్రభుత్వమని.. అందువల్ల మహిళా ప్రభుత్వ ఉద్యోగులకు మూడవ బిడ్డ కోసం ప్రస్తుతం అందుబాటులో ఉన్న ప్రసూతి సెలవును 12 వారాల నుంచి 365 రోజులకు పెంచుతున్నట్లు తెలిపారు. ఈ కొత్త నిబంధనను అమలు చేయడానికి ప్రభుత్వం త్వరలో వివరణాత్మక ఉత్తర్వును జారీ చేస్తుందని శరత్‌కుమార్ తెలిపారు.

తమిళనాడులో ప్రసూతి సెలవులో నిరంతరం మార్పులు చోటు చేసుకుంటున్నాయనేది గమనించదగ్గ విషయం. మొదటగా 2011లో ప్రామాణిక ప్రసూతి సెలవును 90 రోజుల నుంచి ఆరు నెలలకు పొడిగించారు. 2016లో దీనిని ఆరు నెలల నుంచి తొమ్మిది నెలలకు పొడిగించారు. తదనంతరం 2021లో ఏఐఏడీఎంకే-డీఎంకే నేతృత్వంలోని రాష్ట్ర ప్రభుత్వాలు దీనిని తొమ్మిది నెలల నుంచి ఒక సంవత్సరానికి.. అంటే 365 రోజులకు పొడిగించాయి. ఇప్పుడు మూడవ బిడ్డ పుట్టినప్పుడు కూడా 365 రోజుల సెలవును పొడిగించాలని విజయ్ ప్రభుత్వం నిర్ణయించింది.