Wife Harassment: భార్య వేధిస్తుంది, మరణించే అనుమతి ఇవ్వండి..

Wife Harassment: భార్య వేధింపులు భరించలేక ఒక భర్త కారుణ్య మరణాన్ని కోరుతూ అధికారుల్ని ఆశ్రయించడం సంచలనంగా మారింది. తన భార్య, అత్తింటి వారు, బావమరిది వేధింపులు తట్టుకోలేకపోతున్నానని, వారికి శిక్ష విధించలేకపోతే తనకు మరణించే అనుమతి ఇవ్వాలని జిల్లా కలెక్టర్‌కు వినతి పత్రాన్ని సమర్పించారు. బాబు‌భాయ్ పటేల్ అనే వ్యక్తి తన భార్య మోనికా చౌహాన్‌పై తీవ్ర ఆరోపణలు చేశారు. ఆమె కుటుంబం తనను తప్పుడు కేసుల్లో ఇరికించి మానసిక వేదనకు గురిచేస్తున్నారని ఆరోపించారు. పోలీసులకు పలుమార్లు ఫిర్యాదు చేసినా పట్టించుకోవడం లేదని అన్నారు. తనకు మూడు రోజుల్లో న్యాయం చేయకుంటే తీవ్ర నిర్ణయం తీసుకుంటానని హెచ్చరించారు.

తనకు మొదటి వివాహం ద్వారా పుట్టిన 12 ఏళ్ల కుమారుడిని తన భార్య హత్య చేయడానికి ప్రయత్నించిందని పటేల్ ఆరోపించారు. గొంతు నులిమి చంపేందుకు ప్లాన్ చేసినట్లు చెప్పారు. ఈ ఘటనపై పోలీసులకు ఫిర్యాదు చేసినా పట్టించుకోలేదని తెలిపారు. తన కుమారుడికి కౌన్సిలింగ్ చేస్తే అసలు నిజాలు బయటకు వస్తాయని అన్నారు. విడాకుల పేరుతో తన భార్య, ఆమె కుటుంబం డబ్బులు వసూలు చేయడానికి ఒత్తిడి చేస్తోందని ఆరోపించారు.

అయితే, ఈ ఆరోపణలపై పోలీసులు స్పందించారు. భార్యభర్తల మధ్య రాజీ కుదిర్చేందుకు అనేక ప్రయత్నాలు చేశామని తెలిపారు. అయితే వివాదం పరిష్కారం కాకపోవడంతో భార్య తన పుట్టింటికి వెళ్లినట్లు చెప్పారు. ఆ తర్వాత భర్తపై గృహహింసతో పాటు అనేక కేసులు నమోదు చేసినట్లు చెప్పారు. భార్య తన మెయింటనెన్స్ కోసం కోర్టును ఆశ్రయించినట్లు చెప్పారు. కుమారుడిపై హత్యాయత్నానికి సంబంధించిన ఆధారాలు లభిస్తే చట్టపరమైన చర్యలు తీసుకుంటామని పోలీసులు తెలిపారు.