3 Drums, Rs 3.20 Crore Cash: ఉత్తరప్రదేశ్‌లోని ప్రయాగ్‌రాజ్‌లో భారీగా నగదు బయటపడిన ఘటన కలకలం రేపుతోంది. భూమి కింద పాతిపెట్టిన మూడు నీలిరంగు డ్రమ్‌లలో కోట్ల రూపాయల నగదును గుర్తించారు. ఆదాయపు పన్ను శాఖ అధికారులు నగదును లెక్కించగా ఏకంగా రూ.3 కోట్ల 20 లక్షల 93 వేల నగదు ఉన్నట్లు వెల్లడైంది. నగదు లెక్కింపు పూర్తయినప్పటికీ, ఆ ఇంట్లో ఆదాయపు పన్ను శాఖ దర్యాప్తు ఇంకా కొనసాగుతోంది. మరిన్ని నగదు నిల్వలు ఉండే అవకాశం ఉందన్న అనుమానంతో ఇంటి లోపల, ఆవరణలో తవ్వకాలు చేపడుతున్నారు.
మూడు డ్రమ్ముల్లో కోట్ల రూపాయలు
ప్రయాగ్‌రాజ్‌లోని గంగానగర్ జోన్ పరిధిలోని నవాబ్‌గంజ్ పోలీస్ స్టేషన్ ప్రాంతంలోని బరైపూర్ రామ్‌నగర్ గ్రామంలో ఈ ఘటన వెలుగులోకి వచ్చింది. అక్టోబర్ 28న భూమి కింద పాతిపెట్టిన మూడు నీలిరంగు డ్రమ్‌లను అధికారులు గుర్తించారు. వాటిలో భారీ మొత్తంలో నగదు ఉన్నట్లు బయటపడింది. ఆదాయపు పన్ను శాఖ బృందం నగదు మొత్తాన్ని పూర్తిగా లెక్కించగా, మొత్తం రూ.3,20,93,000 లభించినట్లు సమాచారం.
నగదు దొరికినా.. ఇంట్లో తవ్వకాలు కొనసాగుతున్నాయి
మూడు డ్రమ్‌లలో లభించిన నగదు లెక్కింపు పూర్తయినప్పటికీ, అధికారులు అక్కడి దర్యాప్తును నిలిపివేయలేదు. ఆ ఇంట్లో ఇంకా నగదు లేదా ఇతర విలువైన వస్తువులు దాచిపెట్టి ఉండవచ్చనే అనుమానంతో తవ్వకాలు కొనసాగిస్తున్నారు. ఇంటి గదులు, ఆవరణతో పాటు ఇతర ప్రాంతాల్లో కూడా అధికారులు పరిశీలనలు చేస్తున్నారు.
ఈ కేసును దర్యాప్తు చేసేందుకు ఆదాయపు పన్ను శాఖ అధికారులు ఘటనా స్థలంలోనే మకాం వేశారు. దర్యాప్తులో భాగంగా ఇంటి లోపల, బయట సీసీటీవీ కెమెరాలను కూడా ఏర్పాటు చేశారు. మొత్తం చర్యలను నిశితంగా పర్యవేక్షిస్తున్నారు. ఆ ఇంట్లో నివసిస్తున్న రాజేష్ యాదవ్, రాకేష్ యాదవ్‌లను అధికారులు ప్రశ్నిస్తున్నారు. అయితే ప్రస్తుతం అధికారులు ప్రధానంగా రెండు ప్రశ్నలకు సమాధానం కనుగొనే ప్రయత్నం చేస్తున్నారు. ఇంత భారీ మొత్తంలో నగదు ఎక్కడి నుంచి వచ్చింది? ఆ డబ్బును మూడు డ్రమ్‌లలో నింపి భూమి కింద ఎందుకు పాతిపెట్టారు? ఇంట్లో జరుగుతున్న తవ్వకాలు, విచారణ పూర్తయిన తర్వాత ఈ వ్యవహారంలో మరిన్ని కీలక విషయాలు వెలుగులోకి వచ్చే అవకాశం ఉంది.