Flydubai: ఫ్లై దుబాయ్ దర్యాప్తులోకి ఎన్ఐఏ.. యూఏపీఏ కింద కేసు నమోదు

దుబాయ్ నుంచి టెల్ అవీవ్‌కు వెళ్తున్న ఫ్లైదుబాయ్ విమానంలో పైలట్‌పై జరిగిన కత్తి దాడి ఘటనపై జాతీయ దర్యాప్తు సంస్థ (NIA) విచారణ ప్రారంభించింది. ఈ కేసులో యాంటీ హైజాకింగ్ చట్టం, చట్టవ్యతిరేక కార్యకలాపాల నిరోధక చట్టం (UAPA) కింద కేసు నమోదు చేసినట్లు అధికారులు శనివారం వెల్లడించారు. విమానాన్ని హైజాక్ చేయడానికి లేదా కూల్చివేయడానికి ప్రయత్నించినట్లు అనుమానిస్తున్నామని అధికారులు తెలిపారు. ఈ మేరకు అక్టోబర్ 9న NIA ఎఫ్‌ఐఆర్ నమోదు చేసినట్లు వెల్లడించారు. ఈ ఘటన వెనుక ఉద్దేశం ఏమిటి? దాడికి దారితీసిన పరిస్థితులేంటి? అనే అంశాలపై దర్యాప్తు కొనసాగనుంది.

ఈ ఘటనపై NIA యాంటీ హైజాకింగ్ చట్టం, 2016తో పాటు చట్టవ్యతిరేక కార్యకలాపాల నిరోధక చట్టం (UAPA), 1967లోని సంబంధిత సెక్షన్ల కింద కేసు నమోదు చేసింది. విమాన భద్రతకు సంబంధించిన ఈ ఘటనలో పూర్తి వివరాలను సేకరించి, దాడి వెనుక కారణాలను వెలికితీసేందుకు అధికారులు విచారణ చేపట్టారు.

సెప్టెంబర్ 30న ఫ్లైదుబాయ్‌కు చెందిన FZ1073 విమానంలో ఈ ఘటన చోటుచేసుకుంది. విమానం దుబాయ్ నుంచి టెల్ అవీవ్‌కు ప్రయాణిస్తుండగా.. కాక్‌పిట్‌లో భారతీయ పైలట్ కెప్టెన్ స్మిత్ మచ్చర్‌పై కో- పైలట్ కత్తితో దాడి చేశాడు. ఈ దాడిలో కెప్టెన్ తీవ్రంగా గాయపడ్డాడు. ప్రస్తుతం ఆస్పత్రిలో చికిత్స పొందుతున్నాడు.