CJP: 48 గంటల్లో రాజీనామా చేయాలి.. జ్ఞానేశ్ కుమార్‌కు CJP అల్టిమేటం..

CJP:  చీఫ్ ఎలక్షన్ కమిషనర్ (CEC) జ్ఞానేశ్ కుమార్ 48 గంటల్లో రాజీనామా చేయాలని కాక్రోచ్ జనతా పార్టీ(CJP) డిమాండ్ చేసిందడి. ఆయన రాజీనామా చేయకపోతే దేశవ్యాప్ంగా ఆందోళన చేపడుతామని హెచ్చరించారు. రాబోయే అన్ని రాష్ట్రాల్లో అసెంబ్లీ ఎన్నికలను తాత్కాలికంగా నిలిపివేయాలని కూడా కాక్రోచ్ పార్టీ డిమాండ్ చేసింది.

న్యూఢిల్లీ నిర్వహించిన మీడియా సమావేశంలో సీజేపీ వ్యవస్థాపకుడు అభిజిత్ దీప్కే మాట్లాడుతూ.. సీఈసీ రాజీనామా చేయకపోతే, ఢిల్లీలోనే కాకుండా దేశవ్యాప్తంగా ధర్నాలు, నిరసనలు చేపడుతామని అన్నారు. సీజేపీ కో కన్వీనర్ సౌరవ్ దాస్ మూడు ప్రధాన డిమాండ్లను వెల్లడించారు. సీఈసీ రాజీనామా చేయడంతో పాటు జ్ఞానేశ్ కుమార్‌తో పాటు ఆయనకు ఆదేశాలు ఇచ్చినట్లు ఆరోపిస్తున్న వ్యక్తులపై క్రిమినల్ చర్యలు తీసుకోవడం, రాబోయే అన్ని ఎన్నికలను తాత్కాలికంగా నిలిపివేయడం తమ డిమాండ్లని చెప్పారు.

ఇదే సమయంలో స్పెషల్ ఇంటెన్సివ్ రివిజన్(SIR)ను 2025 నాటి ఓటర్ల జాబితా స్థితికి వెనక్కి తీసుకెళ్లాలని సీజేపీ డిమాండ్ చేసింది. SIRకు సంబంధించిన ఫైళ్లను సుప్రీంకోర్టు నేతృత్వంలోని కమిటీ ఆధీనంలో ఉంచాలని, ఎన్నికల కమిషనర్ల నియామకానికి సంబంధించిన ప్రస్తుత చట్టాన్ని రద్దు చేయాలని కూడా డిమాండ్ చేసింది.

ఎన్నికల కమిషనర్లు సుఖ్‌బీర్ సింగ్ సంధు, వివేక్ జోషి గత 10 నెలల్లో కనీసం 14 సందర్భాల్లో ఎన్నికల ప్రక్రియకు సంబంధించిన నిర్ణయాలు, చర్యలపై అభ్యంతరాలు తెలిపారని ది ఇండియన్ ఎక్స్‌ప్రెస్ నివేదిక వెల్లడించింది. అయితే, ఈ నివేదికను ఎన్నికల సంఘం కొట్టిపారేసింది. ఎస్ఐఆర్ సహా అన్ని నిర్ణయాలను పూర్తి కమిషన్ ఆమోదంతోనే ఏకగ్రీవంగా తీసుకున్నామని తెలిపింది. కమిషనర్లు చర్చల సమయంలో అభిప్రాయాలు, సూచనలు, అభ్యంరతాలు వ్యక్తం చేయడం సాధారణ అంతర్గత ప్రక్రియలో భాగమే అని ఈసీ స్పష్టం చేసింది.