Uttar Pradesh: బరేలీ అల్లర్ల నిందితుడి ఇంటికి కాంగ్రెస్ అధ్యక్షుడు.. ముస్లిం ఓట్లే టార్గెట్.!

Uttar Pradesh: ఉత్తర్ ప్రదేశ్ అసెంబ్లీ ఎన్నికలు దగ్గర పడుతున్న సమయంలో రాజకీయ వాతావరణం వేడెక్కింది. తాజాగా యూపీ కాంగ్రెస్ అధ్యక్షుడు అజయ్ రాయ్ బుధవారం రాత్రి బరేలీలోని మౌలానా తౌకీర్ రజా ఇంటికి వెళ్లి, ఆయన కుటుంబ సభ్యుల్ని కలిశారు. మౌలానా తౌకీర్ రజా కుటుంబంతో భేటీ అయిన ఫోటోలను సోషల్ మీడియాలో షేర్ చేశారు. గతేడాది బరేలీ అల్లర్ల కేసులో రజా కీలక నిందితుడి ఉన్నారు, ప్రస్తుతం జైలులో ఉన్నారు.

అజయ్ రాయ్ రజా ఇంటికి వెళ్లడాన్ని చాలా మంది రాజకీయ కోణంలో చూస్తున్నారు. రజా కుమారుడు ఫర్మాన్ రజాను, ఆయన కుటుంబ సభ్యుల్ని కలుసుకుని యోగక్షేమాలు అడిగారు. ఆయన కుటుంబంతో 45 నిమిషాలు మాట్లాడిన తర్వాత రాజధాని లక్నోకు చేరుకున్నారు. ఈ భేటీ నేపథ్యంలో కాంగ్రెస్ ముస్లిం ఓటర్లను తన వైపు తిప్పుకోవడానికి ప్రయత్నిస్తోందని రాజకీయ విశ్లేషకులు భావిస్తున్నారు.

తౌకీర్ రజా కుటుంబంతో భేటీ అయిత తర్వాత అజయ్ రాయ్ యోగి ఆదిత్యనాథ్ సర్కార్‌పై విమర్శలు చేశారు. చట్టబద్ధమైన పాలన కేవలం బలహీనులు, గళం విప్పేవారికేనా? అని ప్రశ్నించారు. ప్రజాస్వామ్య గళాలను అణిచివేయడానికి, అసమ్మతిని అణగదొక్కడానికి అధికార వర్గం ప్రదర్శించే అహంకారం ప్రజాస్వాయ్య వ్యవస్థకు తీవ్ర ఆందోళన కలిగించే విషమయని అన్నారు.