గత 18 ఏళ్లుగా టీవీలో ఎన్నో ట్రావెల్ షోలతో ప్రపంచాన్ని తెలుగు ప్రేక్షకులకు పరిచయం చేసిన ప్రముఖ ట్రావెల్ బ్రాండ్ ‘విహారి’, ఇప్పుడు పూర్తిస్థాయి అంతర్జాతీయ ఓటీటీ ప్లాట్ఫామ్గా అవతరించబోతోంది. ప్రతిష్టాత్మకమైన కాన్స్ ఫిల్మ్ ఫెస్టివల్ వేదికగా ‘బిగ్ బాస్’ ఫేమ్ నటి శ్రీ సత్య చేతుల మీదుగా ‘విహారి OTT’ గ్లోబల్ విజన్ మరియు ప్రత్యేక ప్రివ్యూను ఘనంగా ఆవిష్కరించారు. తెలుగు భాషలో కేవలం పర్యాటకం, ప్రయాణాలకు మాత్రమే అంకితమైన తొలి ప్రత్యేక ఓటీటీ ప్లాట్ఫామ్గా ‘విహారి OTT’ సరికొత్త రికార్డు సృష్టించబోతోంది.
తెలుగు టెలివిజన్ హిస్టరీలో ట్రావెల్ షో అనగానే అందరికీ గుర్తొచ్చే పేరు ‘విహారి’. గత రెండు దశాబ్దాలుగా ప్రపంచంలోని వివిధ దేశాల పర్యాటక ప్రదేశాలు, అక్కడి భిన్నమైన సంస్కృతులు, సాంప్రదాయాలు, స్థానిక రుచులు మరియు జీవన విధానాలను తెలుగు వారికి కళ్లకు కట్టినట్లు చూపిస్తూ ప్రత్యేక గుర్తింపు తెచ్చుకుంది. టెలివిజన్ ద్వారా ఇప్పటివరకు మిలియన్ల మంది హృదయాలను గెలుచుకున్న విహారి, ఇప్పుడు మారుతున్న డిజిటల్ ట్రెండ్కు అనుగుణంగా ఓటీటీ (OTT) రూపంలో గ్లోబల్ ఆడియన్స్ను పలకరించేందుకు సిద్ధమైంది. అన్ని హంగులతో సిద్ధమవుతున్న ‘విహారి OTT’ జూన్ నెలలో ప్రపంచవ్యాప్తంగా గ్రాండ్గా లాంచ్ కానుంది. ఇకపై ప్రపంచ పర్యాటక అందాలను మన సొంత భాష తెలుగులో ఓటీటీ వేదికగా ఎప్పుడైనా, ఎక్కడైనా వీక్షించవచ్చు.