Tarun Bhaskar: విజయ్ వైల్డ్ కార్డు.. నాలుగు ప్లాపులు వస్తేకానీ..?

‘పెళ్లి చూపులు’ చిత్రంతో టాలీవుడ్ కు పరిచయమైన దర్శకుడు తరుణ్ భాస్కర్. మొదటి సినిమాతోనే ఇండస్ట్రీ మొత్తం తనవైపు తిప్పుకొనేలా చేశాడు. రియలిస్టిక్ క్యారెక్టర్స్, నో ఫిల్టర్స్ ఎటువంటి హంగామా లేకుండా చిన్న సినిమాగా రిలీజైన ఈ సినిమా భారీ విజయాన్ని అందుకుంది.. విజయ్ దేవరకొండ లాంటి నాయుడును ఇండస్ట్రీకి అందించింది. ఇక ఈ సినిమా తరువాత ‘ఈ నగరానికి ఏమైంది’ అంటూ కుర్రకారు ఒరిజినల్ ఫ్రెండ్ షిప్ ను చూపించి యూత్ ఐకానిక్ సినిమాగా మార్చేశాడు. ఇక ఆ తరువాత తాను కూడా నటుడిగా మారి పలు సినిమాల్లో నటిస్తూ వస్తున్న తరుణ్ ప్రస్తుతం వెంకటేష్ తో ఒక సినిమా తెరకెక్కించనున్నాడు. ఇకపోతే తాజాగా ఈ డైరెక్టర్ ఒక టీవీ షో లో పాల్గొని తన హీరోల గురించి ఆసక్తికరమైన విషయాలను పంచుకున్నాడు.

మళ్లీ విజయ్ తో సినిమా ఎప్పుడు అన్న ప్రశ్నకు.. “విజయ్ వైల్డ్ కార్డు ఎంట్రీ లాంటి వాడు.. ఒక నాలుగు ప్లాపులు వచ్చాక అతడితో సినిమా చేస్తా.. ప్లాపులు విజయ్ కా.. నీకా అనగానే .. నాకే నాకే” అంటూ చెప్పుకొచ్చాడు. ఇక అలాగే ‘పెళ్లి చూపులు’ షూటింగ్ లో జరిగిన ఒక ఇన్సిడెంట్ ను గుర్తుచేసుకున్నాడు. “ట్రక్కు బ్రేకులు ఫెయిలవగానే అప్పటిదాకా భయపడ్డ విజయ్‌ దేవరకొండ సడన్‌గా రిలాక్స్‌ అయిపోయాడు. దర్శి హ్యాండ్‌ బ్రేక్‌ తీయగానే అది చేతులోకి వచ్చేసింది. తర్వాత ట్రక్కు వెళ్లి చెట్టును ఢీ కొట్టడంతో అందరం బతికిపోయాం. అయితే నేను బతికి ఉన్నానన్నదానికంటే విజయ్‌ ఎందుకలా కూల్‌గా ఉన్నాడో తెలుసుకోవాలన్న ఆతృత ఎక్కువగా ఉందప్పుడు. వెంటనే విజయ్‌ దగ్గరకు వెళ్లి ఎందుకంత రిలాక్స్‌ ఉన్నవని అడిగితే.. ఫస్ట్‌ స్టార్టింగ్‌ల భయం వేసిందిరా, దాని తర్వాత అందరం కలిసి చచ్చిపోతాం కదా, ఏముంది.. అని చెప్పాడు.. దీంతో ఒక్కసారిగా షాక్ అయ్యా” అంటూ చెప్పుకొచ్చాడు. ప్రస్తుతం తరుణ్ వ్యాఖ్యలు నెట్టింట వైరల్ గా మారాయి.