TFJA: టి.ఎఫ్.జె.ఏ. కు పవర్ స్టార్ ప్రశంసలు!

 

తెలుగు ఫిలిమ్ జర్నలిస్ట్స్ అసోసియేషన్ తాజాగా డిజిటల్ మీడియాలోకీ అడుగుపెట్టింది. సొంత యూ ట్యూబ్ ఛానల్ తో పాటు సోషల్ మీడియాలోనూ తన కార్యకలాపాలను ప్రారంభించింది. వీటిని పవర్ స్టార్ పవన్ కళ్యాణ్ శనివారం ప్రారంభించారు. ఈ సందర్భంగా ఆయన మాట్లాడుతూ, ”175 మంది సభ్యులున్న తెలుగు ఫిలిమ్ జర్నలిస్ట్స్ అసోసియేషన్ నిర్దిష్టమైన ప్రమాణాలకు లోబడి వెబ్ సైట్ ని, యూట్యూబ్ ఛానల్ ని నిర్వహించబోతోంది. దానిని నా చేతుల మీదుగా ప్రారంభించడం ఆనందంగా ఉంది. జర్నలిస్టుల కుటుంబ సభ్యులకు రూ. 3 లక్షల మెడికల్ ఇన్సూరెన్స్ కల్పించడం, జీవిత భీమా కింద రూ.15 లక్షలు, ఆక్సిడెంట్ పాలసీ కింద రూ. 25 లక్షలు ఇవ్వడం అనే అంశం నాకెంతో నచ్చింది.

జర్నలిస్టుల కుటుంబ సభ్యులకు ఇది ఎంతో ధైర్యాన్ని ఇస్తుంది. ఈ అసోసియేషన్ ఆదర్శవంతమైన జర్నలిజాన్ని పాటించడంతో పాటు, సమాజంలోని తప్పొప్పులను సరిచేసేలాగా, అనవసరమైన వివాదాల జోలికి వెళ్లకుండా, అలా ఏమైనా జరిగినా గాడిన పెట్టేలా వుండాలని కోరుకుంటూ, మనస్ఫూర్తిగా నా అభినందనలు తెలియ చేసుకుంటున్నాను” అని అన్నారు. ఈ కార్యక్రమంలో తెలుగు ఫిలిమ్ జర్నలిస్ట్స్ అసోసియేషన్ ప్రెసిడెంట్ లక్ష్మి నారాయణ, జనరల్ సెక్రెటరీ వై. జె. రాంబాబు, ట్రెజరర్  నాయుడు సురేంద్ర కుమార్ పాల్గొన్నారు.