‘పక్కా కమర్షియల్’లో ‘సిరివెన్నెల’ స్ఫూర్తి దాయక గీతం!

దివంగత గేయ రచయిత ‘సిరివెన్నెల’ సీతారామ శాస్త్రి కలం నుంచి ఎన్నో స్ఫూర్తి దాయకమైన పాటలు జాలువారాయి. ప్రేక్షకులను ప్రభావితం చేసే పాట రాయాలంటే సీతారామశాస్త్రిని మించిన ఆప్షన్ మరొకటి లేదనేది చిత్రసీమలోని దర్శక నిర్మాతల అభిప్రాయం. ఆయన కెరీర్లో ఎన్నో అద్భుతమైన, ప్రభావవంతమైన పాటలు అందించారు. అలాంటి లెజెండరీ రైటర్ కలం నుంచి చివరిసారిగా జాలువారిన స్ఫూర్తి దాయక గీతం ‘పక్కా కమర్షియల్’లో ఉండటం విశేషం. గోపీచంద్ హీరోగా మారుతి దర్శకత్వంలో తెరకెక్కుతున్న ఈ సినిమాలో టైటిల్ సాంగ్ ‘సిరివెన్నెల’ సీతారామశాస్త్రి రాశారు. ఈ నెల 31 ఈ పాటకు సంబంధించిన గ్లిమ్ప్స్ ను విడుదల చేయడానికి సన్నాహాలు చేస్తోంది చిత్ర బృందం. ఫిబ్రవరి 2 పూర్తి పాట ప్రేక్షకుల ముందుకు రానుంది. ‘సిరివెన్నెల’ చివరిసారి రాసిన జీవిత సారాంశం ఈ పాటలో ఉండడంతో దర్శకుడు మారుతి బాగా ఎమోషనల్ అవుతున్నారు.

‘జన్మించినా మరణించినా ఖర్చే ఖర్చు… జీవించడం అడుగడుగునా ఖర్చే ఖర్చు’ అంటూ సీతారామశాస్త్రి అత్యద్భుతంగా ఈ అందమైన పాట రాశారని, మరణం గురించి ముందే తెలిసినట్టు ఆయన కొన్ని పదాలు ఈ పాటలో సమకూర్చారని అనిపిస్తోందని దర్శకుడు మారుతీ అన్నారు. ఈ పాటలో ఇంకా ఎన్నో అద్భుతమైన పదాలు వున్నాయని.. జీవితం గురించి, పుట్టుక చావు గురించి అద్భుతమైన సాహిత్యం ‘పక్కా కమర్షియల్’ టైటిల్ సాంగ్ లో ఉంటాయని మారుతి చెప్పారు. ‘సిరివెన్నెల’ కలం నుంచి జాలువారిన చిట్టచివరి స్ఫూర్తిదాయక గీతం ఉన్న ‘పక్కా కమర్షియల్’ చిత్రాన్ని యు.వి. క్రియేషన్స్, గీతా ఆర్ట్స్ 2 సంయుక్తంగా నిర్మిస్తున్నాయి.