RC17 Update: RC17పై బిగ్ అప్‌డేట్.. స్క్రిప్ట్ లాక్ చేసిన సుకుమార్.. షూటింగ్ ఎప్పటి నుంచంటే?

RC17 Update: మెగా పవర్ స్టార్ రామ్ చరణ్ ‘పెద్ది’ విజయంతో ఫుల్ జోష్‌లో ఉండగా, ఇప్పుడు అభిమానుల దృష్టి మొత్తం ఆయన నెక్స్ట్ మూవీ RC17పైనే పడింది. ‘రంగస్థలం’ తర్వాత మరోసారి రామ్ చరణ్, సుకుమార్ కాంబినేషన్‌లో సినిమా రాబోతుండటంతో ఈ ప్రాజెక్ట్‌పై భారీ అంచనాలు ఏర్పడ్డాయి. అయితే ఇటీవల ఈ సినిమా షూటింగ్ ఆలస్యమవుతుందనే ప్రచారం మెగా అభిమానుల్లో ఆందోళన కలిగించింది. ముఖ్యంగా ‘పుష్ప’, ‘పుష్ప 2’ చిత్రాల కోసం సుకుమార్ చాలా సమయం తీసుకున్న నేపథ్యంలో, RC17 కూడా అదే బాటలో నడుస్తుందేమోనని సోషల్ మీడియాలో చర్చ జరిగింది. అయితే తాజా సమాచారం ప్రకారం ఆ ఊహాగానాలకు చెక్ పడినట్టే కనిపిస్తోంది. మైత్రీ మూవీ మేకర్స్ వర్గాల సమాచారం ప్రకారం, దర్శకుడు సుకుమార్ ఇప్పటికే RC17 ఫైనల్ స్క్రిప్ట్‌ను పూర్తిగా లాక్ చేసినట్లు తెలుస్తోంది. దీంతో ప్రీ ప్రొడక్షన్ పనులు కూడా వేగంగా కొనసాగుతున్నాయని సమాచారం. అభిమానులు ఊహిస్తున్నట్లుగా ఇది రెండు భాగాల సినిమా కాదని, ఒకే భాగంలో పూర్తి చేసే స్టైలిష్ యాక్షన్ ఎంటర్‌టైనర్‌గా రూపొందించనున్నారని తెలుస్తోంది.

ఈసారి సుకుమార్ పీరియాడిక్, మాఫియా బ్యాక్‌డ్రాప్‌ లాంటి కథను ఎంచుకోలేదని తెలుస్తోంది. పూర్తిగా కొత్త తరహా కమర్షియల్ యాక్షన్ కథతో రామ్ చరణ్‌ను ఇప్పటివరకు చూడని అవతారంలో చూపించేలా స్క్రిప్ట్ సిద్ధం చేసినట్లు టాక్ వినిపిస్తోంది. ‘రంగస్థలం’లో చిట్టిబాబు పాత్రతో చరణ్ నటనకు మంచి గుర్తింపు తీసుకొచ్చిన సుకుమార్, ఈసారి అంతకుమించిన పాత్రను డిజైన్ చేశారనే ప్రచారం అభిమానుల్లో మరింత ఆసక్తి పెంచుతోంది. ప్రస్తుతం అందుతున్న సమాచారం ప్రకారం సెప్టెంబర్‌లో ఈ చిత్రాన్ని ఘనంగా ప్రారంభించేందుకు నిర్మాతలు ప్లాన్ చేస్తున్నారు. అనంతరం నవంబర్ నుంచి రెగ్యులర్ షూటింగ్ ప్రారంభించేలా షెడ్యూల్ సిద్ధం చేస్తున్నట్లు తెలుస్తోంది. దీంతో షూటింగ్ ఆలస్యం అవుతుందనే ప్రచారానికి పెద్దగా ఆస్కారం లేదని సినీ వర్గాలు భావిస్తున్నాయి.

ఇక రీసెంట్ బ్లాక్ బస్టర్ ‘పెద్ది’లో రామ్ చరణ్ తన నటనతో మరోసారి ప్రేక్షకులను ఆకట్టుకున్నారు. స్క్రీన్‌ప్లే విషయంలో కొన్ని విమర్శలు వచ్చినప్పటికీ, చరణ్ పెర్ఫార్మెన్స్, పాత్ర కోసం పడిన కష్టం సినిమాకు ప్రధాన బలంగా నిలిచింది. ఇప్పుడు అదే ఊపును కొనసాగిస్తూ RC17తో మరోసారి బాక్సాఫీస్‌ను టార్గెట్ చేస్తున్నారు. ఇప్పటికే ‘రంగస్థలం’ వంటి ఇండస్ట్రీ హిట్ ఇచ్చిన ఈ కాంబినేషన్ మరోసారి కలవడంతో అంచనాలు కూడా భారీగా ఉన్నాయి. సుకుమార్ మార్క్ ఎమోషన్స్, ఇంటెన్స్ యాక్షన్, రామ్ చరణ్ స్క్రీన్ ప్రెజెన్స్ కలిస్తే మరో బ్లాక్‌బస్టర్ వచ్చే అవకాశాలు ఉన్నాయని అభిమానులు నమ్ముతున్నారు. ఇక ఆఫీషియల్ ప్రకటనలు వెలువడిన తర్వాత ఈ ప్రాజెక్ట్‌కు సంబంధించిన పూర్తి వివరాలు వెల్లడయ్యే అవకాశం ఉంది. ప్రస్తుతం మాత్రం RC17పై వస్తున్న తాజా అప్‌డేట్ తో మెగా అభిమానులు మాత్రం ఫుల్ జోష్ మీద ఉన్నట్లే.