Re entry: ‘మా నీళ్ల ట్యాంక్’ కోసం ప్రియా ఆనంద్ సొంత డబ్బింగ్!

 

శేఖర్ కమ్ముల – రానా ద‌గ్గుబాటి కాంబినేష‌న్లో రూపొందిన ‘లీడర్’ సినిమాతో తెలుగు తెరకు పరిచయమైంది ప్రియా ఆనంద్. ఆ మూవీలో త‌న అందం, అభిన‌యంతో చక్కని గుర్తింపు తెచ్చుకుంది. ఆ తర్వాత ‘రామ రామ కృష్ణ కృష్ణ’, ‘కో అంటే కోటి’, ‘180’ సినిమాల‌తో న‌టిగా మెప్పించింది. కొంత గ్యాప్ త‌ర్వాత ఈ భామ మ‌ళ్లీ త‌న అభిమానుల్ని అల‌రించ‌నుంది.

‘వ‌రుడు కావలెను’ సినిమాతో దర్శకురాలిగా పరిచయమైన లక్ష్మీ సౌజన్య ఇప్పుడు ‘మా నీళ్ల ట్యాంక్’ అనే వెబ్ సిరీస్ ను రూపొందిస్తున్నారు. దీనితో హీరో సుశాంత్ డిజిటల్ వరల్డ్ లోకి అడుగుపెడుతున్నాడు. ఇదే వెబ్ సీరిస్ తో ప్రియా ఆనంద్ తెలుగులోకి రీ-ఎంట్రీ ఇస్తోంది. ఒక చిన్న గ్రామంలో పనికిరాని వాటర్ ట్యాంక్‌ చుట్టూ నడిచే కథ ఇది. సరదా సన్నివేశాలతో రూపుదిద్దుకున్న ఈ వెబ్ సిరీస్ ను జీ5 సంస్థ నిర్మిస్తోంది. సబ్‌ ఇన్‌ స్పెక్టర్‌గా సుశాంత్‌ నటిస్తుండగా, పల్లెటూరు అమ్మాయిగా ప్రియా ఆనంద్ కనిపిస్తోంది. మొత్తం ఎనిమిది ఎపిసోడ్స్‌గా రూపుదిద్దుకుంటున్న ఈ వెబ్‌ సీరిస్‌ జులై 15 నుంచి జీ 5లో స్ట్రీమింగ్‌ కాబోతోంది. ఇప్ప‌టికే విడుద‌లైన టీజ‌ర్ మంచి రెస్పాన్స్ లభించింది. ఈ వెబ్ సిరీస్ కోసం ప్రియా సొంతంగా డ‌బ్బింగ్ చెప్పడం విశేషం. ఈ టీజ‌ర్లో ప్రియా ఆనంద్ న‌ట‌న‌ను ద‌ర్శ‌కుడు విక్ర‌మ్ కె కుమార్ అభినందించారు.