Posani Krishna Murali: సినీ పరిశ్రమలో పారితోషికం విషయంలో స్టార్ నటీనటులు భారీ మొత్తాలు డిమాండ్ చేస్తున్న ఈ రోజుల్లో, సీనియర్ నటుడు పోసాని కృష్ణమురళి చేసిన వ్యాఖ్యలు ప్రస్తుతం సోషల్ మీడియాలో ఆసక్తికర చర్చకు దారితీశాయి. ఎక్కువ పారితోషికం ఇచ్చేందుకు నిర్మాతలు ముందుకు వచ్చినప్పటికీ, తాను స్వయంగా తక్కువ మొత్తానికే సినిమాలు చేశానని ఆయన స్వయంగా వెల్లడించారు. ఇటీవల ఆయన ఎన్టీవీ పాడ్కాస్ట్లో పాల్గొని మాట్లాడుతూ.. ఒకసారి ఓ నిర్మాత రోజుకు రూ.2 లక్షలు పారితోషికంగా ఇస్తామని చెప్పారని, అయితే తనకు అంత మొత్తం అవసరం లేదని భావించి రూ.1 లక్ష చాలు అని చెప్పానన్నారు. ఆ సమయంలో నిర్మాత సుబ్రహ్మణ్యం ఎంతో మంచి వ్యక్తి అని, భవిష్యత్తులో మీ మార్కెట్ పెరిగితే అప్పుడే పారితోషికం పెంచుకుందామని సూచించారని గుర్తు చేసుకున్నారు.
అయితే, తనకు వచ్చిన అవకాశాలే గొప్పవని, వాటి కంటే డబ్బుకు ఎక్కువ ప్రాధాన్యం ఇవ్వలేదని ఆయన చెప్పారు. పారితోషికం పెంచాలని ఎప్పుడూ నిర్మాతలపై ఒత్తిడి చేయలేదని, వారు ఎంత ఇస్తే అంతే సంతోషంగా స్వీకరించేవాడినని పేర్కొన్నారు. “నాకు సినిమాలు చేయడమే ఆనందం. డబ్బు కోసం ఎప్పుడూ సినిమాలు చేయలేదు. ఎక్కువ డిమాండ్ చేయడం నా స్వభావం కాదు. అవకాశాలు ఇచ్చిన ఇండస్ట్రీకి నేను ఎప్పుడూ రుణపడి ఉంటాను. నాకు వచ్చినంతలోనే సంతోషంగా జీవించాను” అని అన్నారు. ఇప్పటితో పోలిస్తే, గతంలో సినీ పరిశ్రమలో ఉన్న అనుబంధాలు, నిర్మాతలపై ఉన్న నమ్మకం, పారితోషికం కంటే పనిపై ఉన్న ప్రేమ ఎంతో భిన్నంగా ఉండేదని ఆయన వ్యాఖ్యల ద్వారా అర్థమవుతోంది. ప్రస్తుతం ఆయన కామెంట్స్ సోషల్ మీడియాలో వైరల్ అవుతున్నాయి.
