అందగాడు వారం వెనక్కి వెళ్ళాడు!
నటుడిగా, దర్శకుడిగా తన ప్రత్యేకతను చాటుకుంటోన్న అవసరాల శ్రీనివాస్ టైటిల్ పాత్రలో నటించిన చిత్రం 101 జిల్లాల అందగాడు. బట్టతల ఉండే యువకుడు గొత్తి సత్యనారాయణగా అవసరాల శ్రీనివాస్ నటించిన ఈ చిత్రంలో, ఆయన ప్రేయసి పాత్రలో రుహానీ శర్మ నటించారు. హిలేరియస్ ఎంటర్టైనర్గా తెరకెక్కిన ఈ చిత్రం ద్వారా రాచకొండ విద్యాసాగర్ దర్శకుడిగా పరిచయం అవుతున్నారు. ఈ చిత్రాన్ని శ్రీవెంకటేశ్వర క్రియేషన్స్, ఫస్ట్ ఫ్రేమ్ ఎంటర్టైన్మెంట్స్, ఎస్వీసీ-ఎఫ్ఈఈ బ్యానర్స్పై దిల్రాజు, డైరెక్టర్ క్రిష్ సమర్పణలో శిరీష్, రాజీవ్ రెడ్డి, సాయిబాబు జాగర్లమూడి నిర్మించారు. ఈ చిత్రాన్ని సెప్టెంబర్ 3న విడుదల చేయబోతున్నారు.
నిజానికి 101 జిల్లాల అందగాడు చిత్రాన్ని ఈ నెల 27న విడుదల చేయాలని నిర్మాతలు తొలుత భావించారు. ఆ విధంగా ప్రకటన కూడా ఇచ్చారు. కానీ అదే తేదీన సుధీర్ బాబు శ్రీదేవి సోడా సెంటర్, సుశాంత్ ఇచ్చట వాహనములు నిలుపరాదు తో పాటు మరికొన్ని సినిమాలు విడుదల కాబోతున్నాయి. ఒకేవారం ఎక్కువ సినిమాలు విడుదలైతే నిర్మాతలే నష్టపోవాల్సి ఉంటుంది కాబట్టి, అలా జరగకుండా అందరూ బావుండాలనే సదుద్దేశంతో తమ 101 జిల్లాల అందగాడు చిత్రాన్ని సెప్టెంబర్ 3న విడుదల చేయాలని నిర్ణయించుకున్నామని నిర్మాతలు తెలిపారు.
శక్తికాంత్ కార్తీక్ సంగీతం అందించిన ఈ సినిమాకు సంబంధించిన వీడియో ప్రోమో, టీజర్, టైటిల్ సాంగ్తో పాటు మనసా వినవా.. లిరికల్ సాంగ్కు ప్రేక్షకుల నుంచి చాలా మంచి స్పందన వచ్చింది. సినిమా ఎలా ఉండబోతుందోనని ప్రేక్షకుల్లో ఆసక్తి క్రియేట్ అయ్యింది. టాలీవుడ్లో డిఫరెంట్ మూవీస్లో నటుడిగా, సెన్సిబుల్ డైరెక్టర్గా, రైటర్గా తనదైన గుర్తింపు సంపాదించుకున్న అవసరాల శ్రీనివాస్ 101 జిల్లాల అందగాడు చిత్రంలో హీరోగా నటించడమే కాకుండా తనదైన కామెడీ పంచులతో ప్రేక్షకులు ఎంజాయ్ చేసేలా మంచి ఎంటర్టైనింగ్ కథను అందించారని నిర్మాతలు తెలిపారు.