Murugadoss Multi Starrer: సల్మాన్, షారూఖ్ తో మురుగదాస్ మల్టీస్టారర్

Murugadoss multi-starrer with Salman and Shah Rukh

తమిళ మురుగదాస్ ఓ బడా మల్టీస్టారర్ కోసం స్కెచ్ వేస్తున్నాడు. గతంలో ‘రమణ’ (ఠాగూర్), ‘గజని’, ‘స్టాలిన్’, ‘తుపాకి’, ‘హాలిడే’, ‘కత్తి’, ‘అకీరా’, ‘సర్కార్’ వంటి పవర్ ప్యాక్ డ్ సినిమాలను అందించిన దర్శకుడు మురుగదాస్. రెండేళ్ళుగా ఖాళీగా ఉన్న ఇతగాడు ఇప్పుడు బాలీవుడ్ లో పవర్ ఫుల్ మల్టీస్టారర్ కోసం కసరత్తు చేస్తున్నాడు. బాలీవుడ్ బడా ఖాన్స్ సల్మాన్ ఖాన్, షారూఖ్ ఖాన్ తో భారీ మల్టీస్టారర్ ప్లాన్ చేస్తున్నాడట. ఈ మేరకు ఇద్దరు ఖాన్స్ కి పవర్ ఫుల్ కథను వినిపించాడట. కథ సల్మాన్, షారూఖ్ ఇద్దిరికీ నచ్చటంతో ఓకె చెప్పినట్లు వినిపిస్తోంది.

సల్మాన్, షారుఖ్ గతంలో కొన్ని సినిమాల్లో కలసి నటించారు. వాటిలో కొన్ని రికార్డ్స్ క్రియేట్ చేశాయి. బాలీవుడ్ ను శాసిస్తున్న ఈ ఇద్దరు ఖాన్స్ ఇటీవల కాలంలో వెనుక బడ్డారు. అయితే ప్రపంచ వ్యాప్తంగా వీరికి పెద్ద సంఖ్యలో అభిమానులు ఉన్నారు. స్టార్ డమ్ వచ్చిన తర్వాత వీరిద్దరూ కలసి చేసిన సినిమాలు తక్కువే. అయితే ఒకరి సినిమాలో ఒకరు గెస్ట్ గా మాత్రం నటిస్తూ వస్తున్నారు. తాజాగా రాబోతున్న షారూఖ్ సినిమా ‘పఠాన్’లో సల్మాన్ అతిథిగా నటిస్తుండగా సల్మాన్ ‘టైగర్ 3’లో షారూఖ్ అతిథిగా మెరవనున్నాడు. ఇక ఇదిలా ఉంటే వీరిద్దరూ కలసి నటించిన ‘కరణ్ అర్జున్’ సెన్సేషనల్ హిట్ అయింది. ‘దుష్మన్ దునియా కా’లో ఇద్దరూ గెస్ట్ పాత్రల్లో కనిపించారు. షారూఖ్ నటించిన ‘కుచ్ కుచ్ హోతా హై’ లో సల్మాన్ ప్రత్యేక పాత్రలో కనిపిస్తాడు.

అలాగే వీరిద్దరూ నటించిన ‘హర్ దిల్ జో ప్యార్ కరేగా’ అంతగా ఆకట్టుకోలేక పోయింది. షారూఖ్ హీరోగా దీపిక తొలి చిత్రం ‘ఓం శాంతి ఓం’లో సల్మాన్ ఓ పాటలో కనువిందు చేస్తాడు. అలాగే సల్మాన్ ‘ట్యూబ్‌లైట్’లో షారూఖ్ ఖాన్ మెజీషియన్ గోగో పాషాగా అతిధి పాత్రలో మెరిశాడు. ఇక షారూఖ్ ‘జీరో’లో షారూఖ్, సల్మాన్ ఇద్దరూ ఓ పాటలో కనిపిస్తారు. ఇప్పుడు ఈ ఇద్దరు ఖాన్స్ తో సినిమా మురుగదాస్ మల్టీస్టారర్ తెరకెక్కితే మాత్రం ఫ్యాన్స్ చిందేయక మానరు. ఇటీవల కాలంలో బాలీవుడ్ సరైన సినిమాలు లేక వెలవెల పోతోంది. తెలుగులో ‘ఆర్ఆర్ఆర్’ లాగా బాలీవుడ్ లో అసలు సిసలు మల్టీస్టారర్ లా ఉంటుందనటంలో ఎలాంటి సందేహం లేదు. మరి మురుగదాస్ ప్రయత్నం సఫలం కావాలని కోరుకుందాం.