Nani: నేచురల్ స్టార్ నాని సమర్పణలో వాల్ పోస్టర్ సినిమా బ్యానర్ పై ప్రశాంతి తిపిర్నేని నిర్మించిన యాంథాలజీ ‘మీట్ క్యూట్’. దీనితో నాని సోదరి దీప్తి గంటా దర్శకురాలిగా పరిచయం అయ్యారు. దీని ట్రైలర్ ను శుక్రవారం విడుదల చేశారు. ఈ టీజర్ కు నాని వాయిస్ ఓవర్ ఇవ్వడం విశేషం. గతంలో వచ్చిన టీజర్ అన్ని ప్రధాన పాత్రలను పరిచయం చేసి రోలర్ కోస్టర్ ఎమోషన్ ని చూపించగా, ట్రైలర్ మరింతగా ఆకట్టుకుంది. ‘నీకు మీట్ క్యూట్ అంటే తెలుసా.. అనుకోకుండా ఇద్దరు పరిచయం లేని వ్యక్తులు మొదటిసారి కలిసినప్పుడు వాళ్ల మధ్య వచ్చే అందమైన పరిస్థితులు.. మాటలు.. ఆ జ్ఞాపకాలు జీవితాంతం గుర్తుండిపోతాయి’ అనే నాని వాయిస్ ఓవర్‌తో ఇది ప్రారంభమైంది. కొన్ని అర్బన్ ప్రేమ కథలను, విభిన్న ప్రేమికుల మధ్య విభిన్న భావోద్వేగాలను ఈ ట్రైలర్ లో ఆవిష్కరించారు. ‘మనం ప్రేమించే వారితో, మనం ఇష్టపడే వాటి కోసం మాత్రమే గొడవ పడతాం’ అనే సందేశాన్ని ఈ యాంథాలజీ హృద్యంగా అందిస్తోంది.
”ఇందులో ప్రతి కథకు ప్రాముఖ్యత ఉంది. ఈ తరం యువతకు రిలవెంట్ గా ఉంటుంది. ఈ సిరీస్ లోని పెద్దలు రెండు తరాల మధ్య వారధిగా కనిపిస్తున్నారు. అన్ని రకాల భావోద్వేగాల సమ్మేళనంగా మంచి ఫీల్ గుడ్ ఎంటర్టైనర్ గా ఈ సీరీస్ ను చిత్రీకరించాం” అని దీప్తి చెప్పారు. అందమైన విజువల్స్ తో పాటు సిరీస్ కు తగినట్లుగా బ్యాక్ గ్రౌండ్ స్కోర్ ఆకట్టుకుంది. దీనికి వసంత్ కుమార్ సినిమాటోగ్రఫీ నిర్వహించగా, విజయ్ బుల్గానిన్ సంగీతం సమకూర్చారు. అవినాష్ కొల్లా ప్రొడక్షన్ డిజైనింగ్ చేయగా.. గ్యారీ బిహెచ్ ఎడిటింగ్ వర్క్ చేశారు. సత్యరాజ్ , రోహిణి మొల్లేటి , అదా శర్మ , వర్షా బొల్లమ్మ, ఆకాంక్ష సింగ్, రుహాని శర్మ ,సునయన, సంచిత, అశ్విన్ కుమార్, శివ కందుకూరి, దీక్షిత్ శెట్టి, గోవింద్ పద్మసూర్య, రాజా ప్రధాన పాత్రలు పోషిస్తున్నారు. యాంథాలజీ సోనీ లివ్ లో ఈ నెల 25న స్ట్రీమింగ్ కాబోతోంది.
