Rajnikanth : జైలర్‌ హిట్టయినా..జైలర్‌2ను తెలుగులో ఎందుకు కొనడం లేదు?

సూపర్ స్టార్ రజనీకాంత్ హీరోగా వచ్చిన ‘జైలర్’ సృష్టించిన ప్రభంజనం అంతా ఇంతా కాదు. నెల్సన్ దిలీప్ కుమార్ దర్శకత్వంలో వచ్చిన ఈ సినిమా తెలుగు రాష్ట్రాల్లో భారీ విజయాన్ని అందుకుంది. దీంతో ఇప్పుడు రాబోతున్న సీక్వెల్ ‘జైలర్ 2‘ పై భారీ అంచనాలు నెలకొన్నాయి. అయితే ఈ సినిమా తెలుగు థియేట్రికల్ రైట్స్ ధర ఇప్పుడు ట్రేడ్ వర్గాల్లో హాట్ టాపిక్‌గా మారింది. మేకర్స్ ఈ సినిమా కోసం ఏకంగా 60 కోట్ల రూపాయలు కోట్ చేస్తున్నట్లు సమాచారం. జైలర్ బ్లాక్ బస్టర్ కావండతో ఆ రేంజ్ లో కోట్ చేస్తున్నారు మేకర్స్.

కానీ రజనీకాంత్ గత సినిమాల మార్కెట్ గ్రాఫ్ ఒకసారి పరిశీలిస్తే రూ. 60 కోట్లు చాలా ఎక్కవనే టాక్ వినిపిస్తోంది. ‘రోబో’ తర్వాత దాదాపు 13 ఏళ్లకు ‘జైలర్’ మళ్ళీ ఆ స్థాయి హిట్‌ను ఇచ్చింది. ఈ సినిమా తెలుగు రైట్స్ కేవలం 12 కోట్ల రూపాయలకే అమ్ముడయ్యాయి. కానీ, బాక్సాఫీస్ వద్ద రూ. 55 కోట్ల రూపాయల భారీ వసూళ్లను రాబట్టి డిస్ట్రిబ్యూటర్లకు కాసుల వర్షం కురిపించింది. ఇక లోకేష్ కనగరాజ్ దర్శకత్వంలో వచ్చిన కూలీ సినిమాపై భారీ అంచనాలు ఉండటంతో తెలుగు రైట్స్ రికార్డు స్థాయిలో రూ. 45 కోట్లకు అమ్ముడయ్యాయి. అయితే కలెక్షన్లు మాత్రం రూ. 44 కోట్లకు పరిమితమవ్వడంతో బయ్యర్లు స్వల్ప నష్టాలను చూడాల్సి వచ్చింది.  రజనీ నటించిన వెట్టయాన్ సినిమా తెలుగులో ఆశించిన స్థాయిలో ఆడలేదు. రూ. 17 కోట్ల రైట్స్ ధరకు గాను కేవలం రూ. 11 కోట్లు మాత్రమే వసూలు చేసి దాదాపు 40% నష్టాలను మిగిల్చింది.

జైలర్ మొదటి భాగం తక్కువ ధరకు రావడంతో భారీ లాభాలు వచ్చాయి. కానీ ఇప్పుడు ‘జైలర్ 2’ కోసం మేకర్స్ అడుగుతున్న రూ. 60 కోట్లు అనేది చాలా పెద్ద మొత్తం అని విశ్లేషకులు భావిస్తున్నారు. ఈ సినిమా బ్రేక్ ఈవెన్ కావాలంటే దాదా.పు రూ. 120 కోట్ల గ్రాస్ వసూలు చేయాల్సి ఉంటుంది. రజనీకాంత్ క్రేజ్ మరియు నెల్సన్ మార్క్ టేకింగ్ పై నమ్మకం ఉన్నప్పటికీ  బయ్యర్లు వెనకడుగు వేస్తున్నారు. ఒకవేళ ఈ ధరకు బయ్యర్లు ముందుకు రాకపోతే కమిషన్ ప్రాతిపదికన సినిమాను విడుదల చేసే అవకాశం ఉంది.