సోనూసూద్ నివాసంలో రెండోరోజు ఐటీ దాడులు

నటుడు, లాక్ డౌన్ రియల్ హీరో సోనూసూద్ పై రెండో రోజు ఐటీ దాడులు కొనసాగుతున్నాయి. నిన్న అర్థరాత్రి వరకూ నటుడు సోనూసూద్ కార్యాలయాలపై దాడులు చేసిన ఆదాయపు పన్ను అధికారులు.. ఈ ఉదయం ముంబైలోని అతని ఇంటికి వెళ్లారు. లక్నోకు చెందిన రియల్ ఎస్టేట్ కంపెనీతో సోనూ సూద్ ఆస్తి ఒప్పందంపై దర్యాప్తు చేస్తున్నారు. పన్ను ఎగవేసినట్లు అనుమానాలున్నాయని, అందుకే ఈ సర్వే ఆపరేషన్ నిర్వహించినట్లు ఐటీ అధికారులు తెలిపారు. నిన్న సోనూ సూద్ తో సంబంధం ఉన్న ఆరు ప్రదేశాలలో ఐటీ అధికారులు తనిఖీలు చేశారు. దాదాపు 20 గంటల పాటు ఈ తనిఖీలు కొనసాగాయి. అయితే సోనూ నివాసం, కార్యాలయాలపై జరుగుతున్న తనిఖీలపై పలు విమర్శలు వినిపిస్తున్నాయి. ఎంతో మందికి సాయం చేసిన సోనూపై ఐటీ దాడులు జరగడం ఏంటని అభిమానులు ప్రశిస్తున్నారు.