మెగాస్టార్ చిరంజీవి రీఎంట్రీ తర్వాత సరైన మాస్ సినిమా చెయ్యలేదు. పొలిటికల్, సోషల్ మెసేజ్, పీరియాడిక్ డ్రామా… ఇలా బ్యాక్ టు బ్యాక్ డిఫరెంట్ జానర్స్ లో చిరు సినిమాలు చేస్తున్నాడు. చిరు ప్రయోగాలు చేస్తుండడంతో మెగా అభిమానులు, ఆయనలోని మాస్ ని మిస్ అవుతున్నారు. అన్నయ్య మాస్ సినిమా చెయ్ అంటూ సోషల్ మీడియాలో సలహాలు కూడా ఇస్తున్నారు. ఒక అభిమాని బాధ ఇంకో అభిమానికే అర్ధం అవుతుంది కదా అందుకే దర్శకుడు బాబీ రంగంలోకి దిగాడు. చిరుని మాస్ అవతారంలోకి తెస్తూ, బాబీ ‘వాల్తేరు వీరయ్య’ సినిమా చేస్తున్నాడు. మాస్ మహారాజ రవితేజ క్యామియో ప్లే చేస్తున్న ఈ మూవీలో చిరు మాస్ మూల విరాట్ గా కనిపించనున్నాడు.
‘వాల్తేరు వీరయ్య’ నుంచి ఇప్పటికే బయటకి వచ్చిన పోస్టర్స్, గ్లిమ్ప్స్ లో చిరు లుంగీ కట్టి ఊరమాస్ గెటప్ లో కనిపిస్తున్నాడు. మెగా అభిమానులకి ఫుల్ మీల్స్ పెట్టేలా ‘వాల్తేరు వీరయ్య’ని డిజైన్ చేస్తున్న బాబీ, ఈ మూవీలో రెండు ఐకానిక్ సీన్స్ ని పెట్టాడట. థియేటర్ లో కూర్చున్న ఆడియన్స్ కి మరింత కిక్ ఇచ్చేలా ఆ ‘రెండు సీన్స్’ని బాబీ స్పెషల్ కేర్ తీసుకోని రూపొందించాడని సమాచారం. రెండు ఐకానిక్ సీన్స్ లో ఒకటి, ‘ముఠామేస్త్రి సినిమాలోని ఈ పేటకి నేనే మేస్త్రీ’ సాంగ్ లోని డాన్స్ స్టెప్… ఇంకొకటి ‘ఖైదీ’ సినిమాలోని పోలిస్ స్టేషన్ సీన్. మెగా అభిమానులకే కాదు యావత్ సినీ అభిమానులకే, ఈ రెండు సీన్స్ అంటే చాలా ఇష్టం. ‘ఖైదీ’ సినిమాలోని పోలిస్ స్టేషన్ సీన్, చిరుని మాస్ హీరోగా నిలబెడితే… ‘ముఠామేస్త్రి స్టెప్’ దాదాపు దశాబ్దం పాటు ప్రతి స్టేజ్ పైనా కనిపించింది. అందుకే అవి ఐకానిక్ మూమెంట్స్ అయ్యాయి. ఇలాంటి రెండు సీన్స్ ని ‘వాల్తేరు వీరయ్య’ సినిమాలో పెట్టి మెగా అభిమానుల్లో జోష్ నింపాలి అనేది బాబీ ప్లాన్. ఒకప్పటి చిరుని గుర్తు తెస్తే చాలు, ‘వాల్తేరు వీరయ్య’ సినిమాని చూడడానికి మెగా అభిమానులే కాదు సినీ ప్రేక్షకులంతా థియేటర్ కి వెళ్తారు.
