Sree Venkateswara Cinemas: ధనుష్, శేఖర్ కమ్ముల మూవీ ఉన్నట్టా? లేనట్టా!?
Shekhar Kammula: ప్రముఖ దర్శకుడు శేఖర్ కమ్ముల సినిమా ‘లవ్ స్టోరీ’ 2021 సెప్టెంబర్ 24న విడుదలైంది. విమర్శకుల ప్రశంసలు కూడా అందుకున్న ఈ సినిమా గౌరవ ప్రదమైన విజయాన్ని అందుకుంది. అదే సమయంలో శేఖర్ కమ్ముల దర్శకత్వంలో ధనుష్ హీరోగా త్రిభాషా చిత్రాన్ని తెరకెక్కిస్తామంటూ చిత్ర నిర్మాణ సంస్థ శ్రీ వెంకటేశ్వర సినిమాస్ ప్రకటించింది. దానికి సంబంధించిన పూజా కార్యక్రమాలను సైతం గత యేడాది నవంబర్ 28న జరిపింది. చిత్రం ఏమంటే ఈ సినిమాతో ధనుష్ టాలీవుడ్ ఎంట్రీ ఇస్తాడనుకుంటే… దీనికంటే ముందే ఈ యేడాది ప్రారంభంలో ‘సార్’ మూవీతో వచ్చాడాయన. గతంలో ధనుష్ నటించిన పలు చిత్రాలు తెలుగులో విడుదలై విజయం సాధించినా, అతని తొలి తెలుగు సినిమాగా ‘సార్’ నిలిచింది. వంద కోట్ల పైగా గ్రాస్ ను వసూలు చేసి ‘సార్’ సక్సెస్ ఫుల్ మూవీగా నిలిచింది. కానీ ధనుష్ నటించబోతున్న రెండో సినిమాకు సంబంధించిన అప్ డేట్స్ మాత్రం ఇంతవరకూ రాలేదు.
వరుసగా సినిమాలను నిర్మిస్తున్న శ్రీ వెంకటేశ్వర సినిమా సంస్థ ఆ యా పనుల్లో బిజీగా ఉంది. ఇటీవలే ఈ బ్యానర్ నుండి పాన్ ఇండియా మూవీ ‘మైఖేల్’ వచ్చింది. సందీప్ కిషన్ నటించిన ఈ సినిమా ఆడియెన్స్ ను తీవ్రంగా నిరాశ పరిచింది. సుధీర్ బాబుతో నిర్మిస్తున్న ‘మామా మశ్చింద్ర’ అతి త్వరలో విడుదల కానుంది. దానికి సంబంధించిన పబ్లిసిటీని కూడా మేకర్స్ మొదలెట్టారు. కానీ ధనుష్ తో తీయబోతున్న ప్రతిష్ఠాత్మక చిత్రం విషయంలో మాత్రం పెదవి విప్పడం లేదు. ‘సార్’ సక్సెస్ ను ఎంజాయ్ చేసిన ధనుష్ కాస్తంత గ్యాప్ తీసుకుని తన తదుపరి చిత్రం ‘కెప్టెన్ మిల్లర్’ మూవీ సెకండ్ షెడ్యూల్ లో ఆ మధ్య పాల్గొన్నాడు. గత యేడాది సెప్టెంబర్ లో ఈ సినిమా రెగ్యులర్ షూటింగ్ మొదలైంది. ఈ యేడాది ద్వితీయార్థంలో ఇది జనం ముందుకు వస్తుందని అంటున్నారు. ఇదే సమయంలో ధనుష్ 50వ చిత్రాన్ని తాము నిర్మించబోతున్నామంటూ ఆ మధ్య సన్ పిక్చర్స్ సంస్థ ప్రకటించింది. ఈ నేపథ్యంలో అసలు శేఖర్ కమ్ముల మూవీ ఉంటుందా ఉండదా? ఒకవేళ ధనుష్ మూవీ ఉండకపోతే… శేఖర్ కమ్ముల ఎవరితో తన తదుపరి చిత్రం చేస్తాడనేది తెలియాల్సి ఉంది. మరి ఈ ప్రశ్నలకు సమాధానం చెప్పాల్సింది శేఖర్ కమ్ములే!