D. Imman: ద్వితీయ వివాహంపై వివరణ ఇచ్చిన సంగీత దర్శకుడు!
ఈ నెల 15వ తేదీ ప్రముఖ సంగీత దర్శకుడు డి. ఇమ్మాన్ ద్వితీయ వివాహం చేసుకున్న సంగతి తెలిసిందే. 2008లో మోనికాను ప్రేమ వివాహం చేసుకున్న ఇమ్మాన్ గత యేడాది డిసెంబర్ లో ఆమెకు విడాకులు ఇచ్చాడు. అయితే తాజాగా చేసుకున్నది పెద్దలు కుదిర్చిన వివాహమని చెబుతూ, ఆ విషయమై తన మనసులోని భావాలను ఇమ్మాన్ సోషల్ మీడియాలో పోస్ట్ చేశాడు.
ప్రముఖ పబ్లిసిటీ డిజైనర్ స్వర్గీయ ఉబల్డ్, చంద్ర ఉబల్డ్ కుమార్తె అమలీతో తన పెళ్లి జరిగిందని, తన తండ్రి జె. డేవిడ్ కిరుబకర దాస్ తన కష్టకాలంగా దన్నుగా నిలిచి ఈ పెళ్ళి జరిపించారని ఇమ్మాన్ తెలిపాడు. పెద్దలు కుదుర్చిన ఈ వివాహం గత కొన్నేళ్ళుగా తాను, ఇతర కుటుంబ సభ్యులు ఎదుర్కొంటున్న సమస్యలకు పరిష్కారం చూపుతుందనే ఆశాభావాన్ని ఇమ్మాన్ వ్యక్తం చేశాడు. తన తల్లి స్వర్గీయ మంజులా డేవిడ్ తో పాటు ఇతర కుటుంబ సభ్యుల ఆశీస్సులతో అమలీ తన జీవితంలోకి అడుగుపెట్టిందన్నాడు.
ఇక నుండి అమలీ కుమార్తె నేత్ర తన మూడో కూతురుగా ఉంటుందని, ఆమె తండ్రిగా వ్యవహరించడం ఎంతో ఆనందంగా ఉందని చెప్పాడు. పెళ్ళి రోజున తన కూతుళ్ళు విరోనికా, బ్లెస్సికా లేకపోవడం లోటు అనిపించిందని, వారు తన ఇంటికి తిరిగి వచ్చే రోజు కోసం సహనంతో వేచి ఉంటానని అన్నాడు. తాను, అమలీ, నేత్రతో పాటు తమ బంధువులంతా వెరోనికా, బ్లెస్సికాను ప్రేమతో స్వాగతించడానికి సిద్ధంగా ఉన్నారని ఇమ్మాన్ తెలిపాడు. తమ పెద్ద కుటుంబంపై వెలకట్టలేని ప్రేమను చూపుతున్న అమలీకి ఈ సందర్భంగా ఇమ్మాన్ కృతజ్ఞతలు తెలిపాడు. అలానే గత కొన్నేళ్ళుగా తనకు సహకరిస్తున్న సంగీత ప్రియులకు ధన్యవాదాలు తెలిపాడు. విశేషమేమంటే ఇదే యేడాది ఏప్రిల్ మాసంలో డి. ఇమ్మాన్ సంగీత దర్శకుడిగా 20 యేళ్ల మైలురాయిని దాటాడు.
#DImman#AmaliUballd#Nethra pic.twitter.com/wRuKWxwuQD
— D.IMMAN (@immancomposer) May 17, 2022