Yash Struggle Story: పాన్ ఇండియా స్టార్ యశ్‌కి ఇలాంటి గతమా? థియేటర్‌లో ఆయన చేసిన పనులు తెలిస్తే షాకవుతారు!

Yash Struggle Story: రాకింగ్ స్టార్ యశ్ తన సినీ ప్రయాణంలో ఎదుర్కొన్న కష్టాలు, స్ట్రగుల్ గురించి ఒక ఇంటర్వ్యూలో ఆసక్తికర విషయాలను వెల్లడించారు. ఈ సందర్భంగా ఆయన మాట్లాడుతూ.. తాను హీరోగా ఎదగక ముందు థియేటర్‌లో పనిచేసిన రోజులను గుర్తుచేసుకున్నారు. సినిమాల్లోకి రాకముందు థియేటర్‌లో పని చేశానని యశ్ తెలిపారు. అక్కడ ఊడ్చడం, తుడవడం మాత్రమే కాకుండా ప్రేక్షకులకు టీలు కూడా అందించాల్సి వచ్చిందని చెప్పారు. అయితే అప్పట్లో తాను చేసిన పనిని ఎప్పుడూ కష్టంగా భావించలేదని అన్నారు. “అందరి దృష్టిలో స్ట్రగుల్ అంటే ఏమిటి? ఈరోజు ఇక్కడ కూర్చొని నా దగ్గర లగ్జరీ ఉందని చూస్తే.. అప్పట్లో నేను ఎదుర్కొన్నది స్ట్రగుల్ అనిపించొచ్చు. కానీ నా దృష్టిలో అప్పుడూ స్ట్రగుల్ ఉంది.. ఇప్పుడూ ఉంది. అప్పట్లో ఊడ్చి, తుడవడంలో కూడా ఆనందం ఉండేది. ఇప్పుడు పెద్ద అవార్డులు అందుకున్నా అదే స్థాయిలో ఆనందం ఉండకపోవచ్చు” అని యశ్ పేర్కొన్నారు. తనకు అప్పట్లోనూ, ఇప్పుడూ పని పట్ల ఒకే విధమైన దృక్పథం ఉందని చెప్పారు. పరిస్థితులను బట్టి ఒక పనిని చిన్నదిగా, పెద్దదిగా చూడకుండా.. దానిలో ఆనందాన్ని వెతుక్కోవడం ముఖ్యమని యశ్ అభిప్రాయపడ్డారు.

అలాగే ఇదే ఇంటర్వ్యూలో ఆయన తన చిన్నతనంలో ఓ నటుడి విషయంలో జరిగిన సంఘటనను కూడా గుర్తుచేసుకున్నారు. తనకు ఎంతో ఇష్టమైన ఓ నటుడు స్కూల్ సమీపంలో సినిమా షూటింగ్ చేస్తున్న సమయంలో అతడిని కలిసేందుకు వెళ్లానని చెప్పారు. అయితే ఆ నటుడు తనకు ఆటోగ్రాఫ్ ఇవ్వడానికి నిరాకరించడంతో.. ఆ తర్వాత ఆయన సినిమాలు చూడటం కూడా మానేశానని చెప్పారు. అయితే ఆ సమయంలో ఆ నటుడు పెద్ద స్టార్ కాదని, కేవలం రెండు మూడు సినిమాలు చేసిన నటుడేనని యశ్ స్పష్టం చేశారు. తాను ఎవరినీ అగౌరవపరచడం కోసం ఈ విషయాన్ని చెప్పడం లేదని, అభిమానులు ఒక నటుడిని స్టార్‌గా తీర్చిదిద్దుతారని మాత్రమే చెప్పాలనుకుంటున్నానని అన్నారు. తన దృష్టిలో అభిమానులే ఏ సినిమా నటుడికైనా అసలైన బలం అని పేర్కొన్నారు. ప్రస్తుతం తాను స్టార్ హీరోగా ఎదిగినా.. అభిమానులు చూపించే ప్రేమ, సపోర్ట్‌ను ఎప్పటికీ మర్చిపోలేనని చెప్పారు. థియేటర్‌లో చిన్నచిన్న పనులు చేస్తూ తన సినీ ప్రయాణాన్ని ప్రారంభించిన యశ్.. ‘కేజీఎఫ్’ సినిమాతో పాన్ ఇండియా స్థాయిలో స్టార్‌గా ఎదిగారు. ప్రస్తుతం ‘టాక్సిక్: ఏ ఫెయిరీ టేల్ ఫర్ గ్రోన్-అప్స్’తో ప్రేక్షకులను అలరించేందుకు సిద్ధమవుతున్నారు.