Zombie Reddy 2: తేజ సజ్జ బర్త్‌డేకు ‘జోంబీ రెడ్డి 2’ బిగ్ సర్‌ప్రైజ్.. ప్రశాంత్ వర్మ హిట్‌కు సీక్వెల్ రెడీ!

Zombie Reddy 2: ‘హనుమాన్’, ‘మిరాయ్’ వంటి భారీ హిట్స్ అందుకున్న యువ హీరో తేజ సజ్జ అభిమానులకు మరో క్రేజీ సర్‌ప్రైజ్ ఇచ్చేందుకు  సిద్ధమవుతున్నారు. తెలుగు సినీ ప్రేక్షకులకు జాంబీ కామెడీకి కొత్త రుచి చూపించిన ‘జోంబీ రెడ్డి’ సినిమాకు ఇప్పుడు సీక్వెల్ రాబోతున్నట్లు సమాచారం. తేజ సజ్జ 31వ పుట్టినరోజు సందర్భంగా ఈ రోజు (ఆగస్టు 23) చిత్రబృందం భారీ ప్రకటన చేయబోతున్నట్లు సంకేతాలు ఇవ్వడంతో సోషల్ మీడియాలో ఆసక్తి ఒక్కసారిగా పెరిగింది. ‘వాళ్లు తిరిగి వస్తున్నారు.. రేపు 10:08కి ప్రళయం మొదలవుతుంది’ అంటూ నిన్న రిలీజ్ చేసిన టీజర్ లైన్ అభిమానుల్లో క్యూరియాసిటీని మరింత పెంచుతోంది.

2021లో ప్రశాంత్ వర్మ దర్శకత్వంలో వచ్చిన ‘జోంబీ రెడ్డి’ తెలుగు సినిమా చరిత్రలో తొలి పూర్తి స్థాయి జాంబీ కామెడీగా ప్రత్యేక గుర్తింపు తెచ్చుకుంది. భయం, నవ్వులు, యాక్షన్‌ను కలిపిన ఆ మూవీ బాక్సాఫీస్ వద్ద బ్లాక్ బస్టర్ హిట్ అందుకోవడంతో పాటు ఓటీటీలో కూడా మంచి ఆదరణ దక్కించుకుంది. ఇప్పుడు అదే ప్రపంచాన్ని మరింత భారీ స్థాయిలో ఫ్రాంచైజీగా విస్తరించే ప్రయత్నంలో భాగంగానే ‘జోంబీ రెడ్డి 2’ను తీసుకొస్తున్నట్లు తెలుస్తోంది.

సినీ వర్గాల సమాచారం ప్రకారం, ఈసారి సినిమా గతంతో పోలిస్తే మరింత పెద్ద స్కేల్‌లో రూపొందనుంది. అయితే ఆసక్తికరమైన విషయం ఏమిటంటే, ఈ సీక్వెల్‌కు ప్రశాంత్ వర్మ దర్శకత్వం వహించకుండా కొత్త దర్శకుడు బాధ్యతలు చేపట్టనున్నట్లు సమాచారం. ఈరోజు ఇచ్చే ఆఫీషియల్ ప్రకటనతో పాటు దర్శకుడు, ఇతర వివరాలు కూడా వెల్లడయ్యే అవకాశం ఉంది.

మొదటి భాగంలో హైదరాబాద్‌కు చెందిన గేమ్ డిజైనర్ మారియోగా తేజ సజ్జ నటించారు. తన స్నేహితుడి పెళ్లి కోసం రాయలసీమకు వెళ్లిన అతను అనుకోకుండా జాంబీ వైరస్ మధ్య చిక్కుకోవడం, రెండు ప్రత్యర్థి కుటుంబాల మధ్య జరుగుతున్న ఘర్షణలు, గ్రామమంతా జాంబీలతో నిండిపోవడం కథను ఆసక్తికరంగా మార్చాయి. చివర్లో శివాలయంలోని పవిత్ర జలంతో వైరస్‌కు నివారణ లభించడం, గ్రామస్తులను కాపాడడం వంటి అంశాలు ప్రేక్షకులను ఆకట్టుకున్నాయి. అదే కథను ఇప్పుడు మరింత విస్తృత ప్రపంచంతో కొనసాగించే అవకాశముందని అభిమానులు అంచనా వేస్తున్నారు.

‘జోంబీ రెడ్డి’లో ఆనంది, దక్ష నాగార్కర్, కిరీటి దామరాజు, ఆర్జే హేమంత్, గెటప్ శ్రీను, లహరి శారి తదితరులు కీలక పాత్రలు పోషించారు. ఆ చిత్రంలోని కామెడీ టైమింగ్, రాయలసీమ బ్యాక్‌డ్రాప్, జాంబీ యాక్షన్ మిక్స్ ప్రేక్షకులకు కొత్త అనుభూతిని ఇచ్చాయి. ఇప్పుడు రెండో భాగంలో పాత పాత్రలు తిరిగి వస్తాయా? లేక కొత్త పాత్రలతో కథ ముందుకు సాగుతుందా? అనే ఆసక్తి కూడా నెలకొంది.

ఇదిలా ఉంటే, తేజ సజ్జ ప్రస్తుతం వరుస భారీ ప్రాజెక్టులతో బిజీగా ఉన్నారు. ఇటీవల ‘మిరాయ్’తో ప్రేక్షకులను అలరించిన ఆయన, ఆ సినిమా  సీక్వెల్‌ను కూడా ప్రకటించారు. అలాగే పీపుల్ మీడియా ఫ్యాక్టరీతో కలిసి ఒక సైన్స్ ఫిక్షన్ ప్రాజెక్ట్ కూడా చేస్తున్నారు. మొదట ఆ సినిమాను 2027 సంక్రాంతికి విడుదల చేస్తామని ప్రకటించినప్పటికీ, విడుదల తేదీలో మార్పు వచ్చే అవకాశమున్నట్లు సమాచారం.

ఇలాంటి సమయంలో ‘జోంబీ రెడ్డి 2’ ప్రకటన రావడం తేజ సజ్జ అభిమానులకు డబుల్ ట్రీట్‌గా మారింది. తొలి భాగం తెలుగు జాంబీ సినిమాలకు కొత్త దారిని చూపించగా, ఇప్పుడు రెండో భాగం మరింత భారీ స్థాయిలో వస్తే ఫ్రాంచైజీగా నిలిచే అవకాశం ఉందనే అంచనాలు ఉన్నాయి. మరి ఆగస్టు 23న 10:08 గంటలకు రానున్న ఆఫీషియల్ ప్రకటనలో చిత్రబృందం ఎలాంటి సర్‌ప్రైజ్ ఇవ్వబోతుందో చూడాలి.