Mallepoola Pallaki Song: మాస్ మహారాజా రవితేజ, దర్శకుడు శివ నిర్వాణ కాంబినేషన్లో తెరకెక్కుతున్న ప్రతిష్ఠాత్మక చిత్రం ‘ఇరుముడి’. మైత్రీ మూవీ మేకర్స్ నిర్మిస్తున్న ఈ సినిమా ఆగస్టు 21, 2026న ప్రేక్షకుల ముందుకు రానుంది. తాజాగా ఈ చిత్రం నుంచి ‘మల్లెపూల పల్లకి’ లిరికల్ వీడియో సాంగ్ను మేకర్స్ విడుదల చేశారు. ‘మల్లెపూల పల్లకి’ పాటలో రవితేజ మాస్ ఎనర్జీ ప్రత్యేక ఆకర్షణగా నిలిచింది. డప్పు శ్రీను పాడిన ఈ పాటకు చౌడం శ్రీనివాసరావు సాహిత్యం అందించారు. ఈ పాటకు ఒరిజినల్ కంపోజర్ సుంకర అంజనేయులు అందించిన సంగీతాన్ని, ఈ చిత్ర సంగీత దర్శకుడు జి.వి. ప్రకాశ్ కుమార్ రీక్రియేట్ చేశారు. ఇరుముడి నేపథ్యానికి తగ్గట్టుగా పాటలోని సంగీతం, జానపద టచ్ ప్రేక్షకులను ఆకట్టుకునేలా ఉన్నాయి.
ఇటీవల ఈ చిత్ర డైరెక్టర్ శివ నిర్వాహ మాట్లాడుతూ.. ఈ సినిమాకు ‘ఇరుముడి’ అనే టైటిల్ పెట్టడానికి కారణాలను వెల్లడించారు. ఈ చిత్ర కథ ప్రాథమికంగా మూడు లేయర్లలో సాగుతుందని తెలిపారు. టైటిల్కు ఈ కథలోని మూడు లేయర్స్కి సంబంధం ఉందని చెప్పారు. అయ్యప్ప స్వామికి, ఆయనను కొలిచే భక్తుడికి మధ్య ఉండే అనుబంధం ఒక లేయర్ కాగా.. తండ్రి, కుమార్తె మధ్య ఉన్న బంధం మరో ముఖ్యమైన అంశమని, ఇక మూడో లేయర్గా సినిమాలోని సస్పెన్స్, చిన్న క్రైమ్ యాంగిల్, ఊహించని ప్రపంచం ఉంటుందని వెల్లడించారు. సాధారణంగా ఒక చిక్కుముడిని ‘ముడి’ అని అంటామని, కథలోని అన్ని అంశాలను కలిపే ఆ ముడి ఆధారంగానే ‘ఇరుముడి’ అనే టైటిల్ను పెట్టినట్లు తెలిపారు. ఇక ఈ సినిమాలో రవితేజ సరసన ప్రియా భవానీ శంకర్ హీరోయిన్గా నటిస్తున్నారు. బేబీ నక్షత్ర కీలక పాత్రలో కనిపించనుండగా, సాయికుమార్ ముఖ్యమైన పాత్ర పోషిస్తున్నారు. నవీన్ యెర్నేని, వై. రవిశంకర్ నిర్మిస్తున్న ఈ సినిమాను శివ నిర్వాణ తెరకెక్కిస్తున్నారు. ఆగస్టు 21న ‘ఇరుముడి’ థియేటర్లలోకి రానున్న నేపథ్యంలో.. తాజాగా విడుదలైన ‘మల్లెపూల పల్లకి’ పాట సినిమాపై మరింత ఆసక్తిని పెంచుతోంది.
