Ram Charan: “మన కుటుంబాన్ని మార్చేసిన ఆ రోజును మర్చిపోలేం నాన్న” చిరంజీవిపై రామ్ చరణ్ ఎమోషనల్ పోస్ట్..

Ram Charan: తెలుగు సినీ యవనికపై ‘మెగా’ శకానికి నాంది పలికి దాదాపు అర్ధ శతాబ్దం కావస్తోంది. స్వయంకృషితో ఎదిగి, కోట్లాది మంది గుండెల్లో చిరస్థాయిగా నిలిచిన మెగాస్టార్ చిరంజీవి వెండితెరకు పరిచయమై నేటికి సరిగ్గా 48 ఏళ్లు పూర్తయ్యాయి. ఈ అపూర్వ ఘట్టాన్ని పురస్కరించుకుని ఆయన కుమారుడు, గ్లోబల్ స్టార్ రామ్ చరణ్ పంచుకున్న అత్యంత భావోద్వేగ సందేశం ప్రస్తుతం సోషల్ మీడియాలో వైరల్ అవుతోంది. చిరంజీవి నటించిన తొలి చిత్రం ‘పునాది రాళ్లు’ అయినప్పటికీ, ప్రేక్షకుల ముందుకు మొదటగా వచ్చిన ‘ప్రాణం ఖరీదు’తో ఆయన సినీ ప్రయాణం అధికారికంగా ప్రారంభమైంది. ఆ రోజును గుర్తుచేసుకుంటూ రామ్ చరణ్ ఎక్స్ (ట్విట్టర్) వేదికగా హృదయపూర్వక నోట్ రాశారు.

“నాన్నా.. ఇండస్ట్రీలో నీ అడుగులు పడి 48 ఏళ్లు గడిచిపోయాయి. మన కుటుంబ భవిష్యత్తును, మన తలరాతను సమూలంగా మార్చేసిన ఆ చారిత్రక రోజును మేం ఎప్పటికీ మర్చిపోలేం. కుటుంబం కోసం నువ్వు పడిన కష్టానికి ఎల్లప్పుడూ కృతజ్ఞులమై ఉంటాం. దశాబ్దాలుగా నిన్ను గుండెల్లో పెట్టుకుని చూసుకుంటున్న ప్రేక్షకుల నిస్వార్థమైన ప్రేమకు జీవితాంతం రుణపడి ఉంటాం. నీ అలుపెరగని ప్రయాణమే మా అందరికీ నిరంతర స్ఫూర్తి. నీ సినీ ప్రస్థానంలో గోల్డెన్ జూబ్లీ (50 ఏళ్ల) మైలురాయిని అట్టహాసంగా వేడుక చేసుకునే ఆ క్షణం కోసం కళ్లు కాయలు కాచేలా ఎదురుచూస్తున్నా” అంటూ చరణ్ తన తండ్రిపై అభిమానాన్ని చాటుకున్నారు. నాడు ‘ప్రాణం ఖరీదు’తో స్టార్ట్ అయిన ఒక సాధారణ యువకుడి ప్రయాణం.. నేడు భారతీయ చిత్రసీమ గర్వించదగ్గ మెగా సామ్రాజ్యంగా విస్తరించింది. 48 ఏళ్లు గడిచినా నేటికీ అదే ఎనర్జీతో యువ హీరోలకు పోటీనిస్తున్న చిరు, త్వరలోనే 50 ఏళ్ల అరుదైన గోల్డెన్ జూబ్లీ మైలురాయిని అందుకోనుండటం మెగా అభిమానుల్లో సరికొత్త ఉత్సాహాన్ని నింపుతోంది.

48 years since you began your journey in cinema, Nanna ❤️

Every day, we think of that day that changed everything for you and our family. I am grateful for everything you have done and to the audience for the constant love and support they have given you.

Your journey will… https://t.co/C8DMJ4L4Vp

— Ram Charan (@AlwaysRamCharan) September 23, 2026