‘Dejavu’: మిస్టరీ థ్రిల్లర్ ‘డెజావు’కు విశేష ఆదరణ!

Arulnidhi: కంటెంట్ ప్రధానంగా తెరకెక్కిన మిస్టరీ థ్రిల్లర్ చిత్రం ‘డెజావు’ సూపర్ హిట్ టాక్‌ను సొంతం చేసుకున్న సంగతి తెలిసిందే! విమర్శకుల ప్రశంసలు అందుకున్న ఈ చిత్రం తెలుగులో అమెజాన్ ప్రైమ్ వీడియోలో విజయవంతంగా స్ట్రీమింగ్ అవుతోంది. అరుల్‌నిథి, మధుబాల, స్మృతి వెంకట్, అచ్యుత్ కుమార్, కాళీ వెంకట్, మైమ్ గోపి ప్రధాన పాత్రల్లో నటించిన ఈ మిస్టరీ థ్రిల్లర్‌కి అరవింద్ శ్రీనివాసన్ దర్శకత్వం వహించారు. గ్రిప్పింగ్ ట్విస్ట్‌లు, ఊహించని మలుపులతో శ్రీనివాసన్ ఈ చిత్రాన్ని తెరకెక్కించారు.

ఒక నవలా రచయిత ఊహించిన పాత్రలు సజీవంగా వచ్చి అతన్ని బెదిరించడం మొదలుపెడతాయి. కల్పన అనేది భయానక వాస్తవంగా మారినప్పుడు ఏమి జరుగుతుందన్నదే ‘డెజావు’ చిత్రం. ఈ కథలోని హత్యలు, ఇతర ఘోరమైన ఘటనలు చోటుచేసుకోవడం, ఆ పైన పోలీస్ ఇన్వెస్టిగేషన్ జరగడంతో ఉత్కంఠ తారాస్థాయికి చేరుకుంటుంది. ఆ టెంపోను చివరి వరకూ దర్శకుడు నిలబెట్టడం వీక్షకులను ఆకట్టకున్న ప్రధానాంశం. ఈ యేడాది జూలైలో తమిళంలో ఈ సినిమా థియేటర్లలో విడుదలైనప్పుడు సక్సెస్ టాక్ సొంతం చేసుకుంది. విమర్శకుల ప్రశంసలూ అందుకుంది. ఈ విధమైన డిఫరెంట్ కంటెంట్, థ్రిల్లింగ్ అనుభూతిని తెలుగు ప్రేక్షకులకు అందించాలనే ఉద్దేశంతో భవాని డీవీడీ ఇంక్ పై రాజశేఖర్ అన్నభీమోజు తెలుగు వెర్షన్‌ను నిర్మించారు. దీనికి జిబ్రాన్ అందించిన సంగీతం, పీజీ ముత్తయ్య సినిమాటోగ్రఫీ ప్రశంసలు అందుకుంది.