Kiran Abbavaram: నన్ను తిట్టారు.. కొట్టారు.. తన్నారు! కిరణ్ అబ్బవరం ఎమోషనల్ కామెంట్స్!

Kiran Abbavaram: టాలీవుడ్‌లో ఎలాంటి బ్యాక్‌గ్రౌండ్ లేకుండా వచ్చి హీరోగా నిలదొక్కుకోవడం అంటే సామాన్యమైన విషయం కాదు. అసలు ఇండస్ట్రీలో తనకు ప్లేస్ దొరుకుతుందా లేదా అన్న మీమాంసతో జర్నీ స్టార్ట్ చేసిన కిరణ్ అబ్బవరం.. ఈరోజు టాలీవుడ్‌లో మోస్ట్ బిజీ హీరోగా మారారు. నేడు ఆయన పుట్టినరోజు సందర్భంగా ఏర్పాటు చేసిన చెన్నై లవ్ స్టోరీ మూవీ ప్రెస్ మీట్ లో కెరీర్ ఎదుగుదలపై కిరణ్ చేసిన కొన్ని వ్యాఖ్యలు నెట్టింట వైరల్ అవుతున్నాయి. ఒకప్పుడు ఛాన్సుల కోసం తిరిగిన కిరణ్, ఇప్పుడు కథ వినడానికి ఒప్పుకుంటాడా లేదా? కాల్ షీట్లు ఇస్తాడా లేదా? అనే స్థాయికి ఎదిగారు.

దీనిపై కిరణ్ అబ్బవరం స్పందిస్తూ తీవ్ర భావోద్వేగానికి గురయ్యారు. “గడిచిన ఐదేళ్లలో ఇండస్ట్రీలో నేను ఏం సంపాదించాను అంటే.. ప్రేక్షకుల నుంచి అపారమైన ప్రేమను సంపాదించాను. ఈ ఐదేళ్లలో నన్ను తిట్టారు, పొగిడారు, కొట్టారు, తన్నారు.. అన్నీ జరిగాయి. కానీ ఇవాళ ఎక్కడో ఒకచోట ‘కిరణ్ అబ్బవరం’ అనే పేరు గురించి డిస్కషన్ జరుగుతుందంటే అదే నా అదృష్టం, నేను సాధించిన సక్సెస్” అని పేర్కొన్నారు. సినిమా పిచ్చితో నిద్ర లేచినప్పటి నుంచి మంచి సినిమాలు చేయాలనే తాపత్రయమే తనను ఈ స్థాయిలో నిలబెట్టిందని, హీరోగానే కాకుండా, డైరెక్షన్‌పై కూడా తన దృష్టి ఉందని హింట్ ఇచ్చారు.