Kartikeya Gummakonda : తన ‘కమ్‌బ్యాక్’ కోసం మెగాఫోన్ పట్టిన ‘ఆర్ఎక్స్ 100’ హీరో.. 

టాలీవుడ్ యంగ్ అండ్ టాలెంటెడ్ హీరో కార్తికేయ గుమ్మకొండ గురించి ప్రత్యేకంగా పరిచయం అక్కర్లేదు. డెబ్యూ మూవీ ‘ఆర్ఎక్స్ 100’తో ఓవర్ నైట్ స్టార్ గా మారిపోయి సెన్సేషన్ క్రియేట్ చేసిన ఈ కుర్ర హీరో.. ఆ తర్వాత ‘నానీస్ గ్యాంగ్ లీడర్’, కోలీవుడ్ స్టార్ అజిత్ ‘వలిమై’ సినిమాల్లో విలన్‌గా తనలోని క్రూరత్వాన్ని చూపించి మెప్పించాడు. అయితే, గత రెండేళ్లుగా వెండితెరకు దూరమైన కార్తికేయ.. ఇప్పుడు ఓ సంచలన నిర్ణయంతో టాలీవుడ్ వర్గాలను తీవ్రంగా ఆశ్చర్యపరిచాడు. కేవలం హీరోగానే కాకుండా, ఏకంగా మెగాఫోన్ పట్టి దర్శకుడిగా తన అదృష్టాన్ని పరీక్షించుకునేందుకు సిద్ధమయ్యాడు. రెండేళ్ల సుదీర్ఘ విరామం తర్వాత కార్తికేయ చేస్తున్న కొత్త సినిమా టైటిల్ ‘కమ్‌బ్యాక్’ (COMEBACK). విశేషం ఏంటంటే.. ఈ చిత్రానికి కార్తికేయనే స్వయంగా కథ సమకూర్చుకుని, దర్శకత్వం వహిస్తూ హీరోగా నటిస్తున్నాడు. శనివారం (సెప్టెంబర్ 21) తన పుట్టినరోజు సందర్భంగా ఈ సినిమా టైటిల్ అనౌన్స్మెంట్ గ్లింప్స్‌ను మేకర్స్ విడుదల చేశారు.

ఈ గ్లింప్స్ లోని డైలాగ్స్ ఇప్పుడు నెట్టింట ఆసక్తి రేపుతున్నాయి. “బాక్సింగ్ వరల్డ్‌లో తన పేరు వినిపించి మూడేళ్ళు అవుతోంది.. మూడేళ్ళ నుంచి ఏమైపోయాడో తెలియలేదు.. అయినా ఇప్పుడు వచ్చి ఏం చేస్తాడు? ఇట్ ఫీల్స్ లైక్ సూసైడ్ మిషన్ (ఒక విధంగా అది ఆత్మహత్య చేసుకోవడమే)” అంటూ వచ్చే వాయిస్ ఓవర్ సినిమాపై విపరీతమైన క్యూరియాసిటీని పెంచుతోంది. ఇందులో కార్తికేయ ఒక పవర్‌ఫుల్ బాక్సర్ పాత్రలో కనిపించనున్నాడు. మరో విశేషం ఏంటంటే, తన సొంత బ్యానర్ కార్తికేయ క్రియేటివ్ వర్క్స్ పతాకంపై రూపొందుతున్న ఈ సినిమాతో తన సతీమణి లోహితా రెడ్డిని నిర్మాతగా పరిచయం చేస్తున్నాడు కార్తికేయ. సరస్వతి శుక్లా సమర్పిస్తున్న ఈ చిత్రానికి క్రియేటివ్ డైరెక్టర్‌గా సూర్య ఆకెళ్ల వ్యవహరిస్తుండగా.. ‘బేబీ’ ఫేమ్ విజయ్ బుల్గానిన్ అదిరిపోయే బ్యాక్‌గ్రౌండ్ స్కోర్ (BGM) అందించాడు. గ్లింప్స్‌లో కార్తికేయ స్కిప్పింగ్, బాక్సింగ్ చేస్తూ తన సిక్స్ ప్యాక్ బాడీతో సూపర్ ఫిట్ అండ్ హ్యాండ్సమ్ లుక్‌లో అదరగొట్టాడు. జగదీశ్ చీకటి విజువల్స్ గ్రిప్పింగ్ గా ఉన్నాయి. ఒక పక్క హీరోగా నటిస్తూ, మరోపక్క దర్శకత్వ బాధ్యతలు మోయడం, పైగా నిర్మాణ వ్యవహారాలు చూసుకోవడం అంటే మామూలు రిస్క్ కాదు. అందులోనూ రెండేళ్ల గ్యాప్ తర్వాత వస్తున్న సినిమా కావడంతో ఇది కార్తికేయ కెరీర్‌కు అత్యంత కీలకం కానుంది. తన స్వీయ దర్శకత్వంలో వస్తున్న ఈ ‘కమ్‌బ్యాక్’ సినిమాతో ఈ యంగ్ హీరో నిజంగానే సాలిడ్ కమ్‌బ్యాక్ ఇస్తాడో లేక టీజర్ లో చెప్పినట్లు సూసైడ్ మిషన్ అవుతుందో చూడాలి!