Sumalatha: ఫిలిం ఫెడరేషన్ అధ్యకుడు అనిల్ ను సస్పెండ్ చేయాలి

టాలీవుడ్ కొరియోగ్రాఫర్ జానీ మాస్టర్ మీద గతంలో విధించిన సహాయ నిరాకరణ కొనసాగుతుందని తెలుగు ఫిల్మ్ ఇండస్ట్రీ ఎంప్లాయీస్ ఫెడరేషన్ మరో నిర్ణయం తీసుకున్న సంగతి తెలిసిందే. అయితే, ఈ విషయాన్ని జానీ మాస్టర్ భార్య, తెలుగు ఫిల్మ్ డాన్సర్స్ అసోసియేషన్ మాజీ అధ్యక్షురాలు సుమలత తీవ్రంగా ఖండిస్తున్నారు. జానీ మాస్టర్‌‌పై విధించిన సస్పెన్షన్‌ను వెంటనే ఎత్తివేయాలని ఆమె డిమాండ్ చేశారు.

ముప్పై ఏళ్ల తర్వాత ఒక మహిళ అధ్యక్షురాలు కావడాన్ని తట్టుకోలేకపోతున్నారని ఆమె ఆరోపించారు. డాన్సర్స్ యూనియన్‌లో అవినీతి జరుగుతోందని, అవినీతిపై ప్రశ్నిస్తే అసోసియేషన్ లేకుండా చేసే ప్రయత్నం చేస్తున్నారని తెలుగు ఫిల్మ్ ఫెడరేషన్ మీద ఆరోపణలు గుప్పించారు.

ఇక తెలుగు చిత్రపురి హౌసింగ్ సొసైటీలో సైతం అక్రమాలు జరుగుతున్నాయని ఆరోపించిన ఆమె, ఫెడరేషన్ పేరు చెప్పుకొని యూనియన్లను బెదిరించే ప్రయత్నాలు చేస్తున్నారని కూడా అన్నారు. అసలు ఫిల్మ్ ఫెడరేషన్ అధ్యక్షుడు అనిల్‌ను వెంటనే సస్పెండ్ చేయాలని, అనిల్‌ను అధ్యక్ష పదవి నుంచి తొలగించాలని కూడా ఆమె డిమాండ్ చేశారు.
అయితే, తెలుగు ఫిల్మ్ ఛాంబర్ వద్ద కొంతమంది తెలంగాణవాదులుగా చెప్పుకుంటున్న వారు, తెలంగాణ వ్యక్తి కాని వల్లభనేని అనిల్‌ను ఫిల్మ్ ఫెడరేషన్ అధ్యక్షుడిగా ఎలా ఉంచుతారని ప్రశ్నిస్తూ, అతన్ని ఆ పదవి నుంచి తొలగించాలని డిమాండ్ చేస్తున్నారు. అక్కడికి చేరుకున్న సుమలత వారికి మద్దతు పలికారు.