Hanuman Ansh : త్రివిక్రమ్ ఔట్, సెన్సార్ బ్రేక్.. ఆగిపోయిన ‘హనుమాన్ అన్ష్’!

గ్లోబల్ బాక్సాఫీస్ వద్ద ఏకంగా రూ. 300 కోట్ల కలెక్షన్ల మార్క్‌ను చేరుకుని సంచలనం సృష్టిస్తున్న ‘హనుమాన్ అన్ష్’ చిత్రానికి తెలుగు నాట ఊహించని బ్రేకులు పడ్డాయి. అన్నీ అనుకున్నట్లు జరిగితే సెప్టెంబర్ 18న ఈ చిత్రం తెలుగు రాష్ట్రాల్లో గ్రాండ్‌గా విడుదల కావాల్సి ఉంది. కానీ, రిలీజ్‌కు సరిగ్గా కొద్ది రోజుల ముందు చోటుచేసుకున్న నాటకీయ పరిణామాలు ఈ డబ్బింగ్ సినిమా భవితవ్యాన్ని ప్రశ్నార్థకంలో పడేశాయి. ఫార్చ్యూన్ ఫోర్ సినిమాస్ బ్యానర్‌పై ప్రముఖ దర్శకుడు, మాటల మాంత్రికుడు త్రివిక్రమ్ శ్రీనివాస్ ఈ చిత్రాన్ని తెలుగులో ప్రెజెంట్ చేసేందుకు ముందుకొచ్చారు. ఆయన బ్రాండ్ నేమ్ వల్ల తెలుగు మార్కెట్‌లో ఈ సినిమాపై మంచి బజ్ క్రియేట్ అయింది. కానీ, అనూహ్యంగా ఈ ప్రాజెక్ట్ నుంచి త్రివిక్రమ్ తప్పుకున్నట్లు విశ్వసనీయ వర్గాల సమాచారం. లాస్ట్ మినిట్ లో డీల్ క్యాన్సిల్ అవ్వడం వల్లే సెప్టెంబర్ 15న హైదరాబాద్‌లో జరగాల్సిన భారీ టీజర్ లాంచ్ ఈవెంట్‌ను రాత్రికి రాత్రే రద్దు చేశారు. ఆయన ఎగ్జిట్‌పై చిత్రబృందం నుంచి ఇంకా ఎలాంటి అధికారిక ప్రకటన రాలేదు.

ఒకవేళ రాత్రికి రాత్రే కొత్త డిస్ట్రిబ్యూటర్ దొరికినా సినిమా రిలీజ్ అవ్వడం ఇప్పుడున్న పరిస్థితుల్లో అంత సులువు కాదు. ‘హనుమాన్ అన్ష్’ తెలుగు వెర్షన్‌కు సెన్సార్ బోర్డు నుంచి ఇంకా గ్రీన్ సిగ్నల్ రాలేదని, క్లియరెన్స్ కోసం పెండింగ్‌లో ఉందని లేటెస్ట్ రిపోర్ట్స్ చెబుతున్నాయి. సెన్సార్ సర్టిఫికేట్ రాకపోవడం, ప్రెస్ మీట్స్ జరగకపోవడం, ఇప్పటివరకు కనీసం తెలుగు ట్రైలర్ కూడా రిలీజ్ చేయకపోవడంతో ఈ ప్రాజెక్ట్ చుట్టూ అనిశ్చితి నెలకొంది. కొత్త ప్రెజెంటర్ దొరికి, సెన్సార్ పనులు పూర్తయితే కానీ సినిమా థియేటర్లలోకి రాలేదు. ఒకవైపు వందల కోట్లు కొల్లగొడుతున్న ఈ సినిమా తెలుగు వెర్షన్ ఈ శుక్రవారమే థియేటర్లలో పడుతుందా? లేక వాయిదా తప్పదా? అనేది ఇప్పుడు ట్రేడ్ వర్గాల్లో తీవ్ర ఉత్కంఠ రేపుతోంది.